Улуу тириэньэр Дмитрий Коркин туһунан киинэ сценарийа бигэргэннэ

Дьокуускайга бэҕэһээ, ыам ыйын 19 күнүгэр, көҥүл тустууга аатырбыт тириэньэр Дмитрий Коркин төрөөбүтэ 95 сылынан тахсыахтаах уус-уран киинэ сценарийын чопчулуур мунньах буолан ааста.

Сценарийы ырытыыга Дмитрий Петрович кэргэнэ Александра Коркина, Олимпиада чөмпүйүөнэ Павел Пинигин, Олимпиада призера Александр Иванов, Саха сирин сүүмэрдэммит хамаандаларын бэлэмниир киин дириэктэрэ Михаил Пахомов кыттыыны ыллылар.

Киинэ Успуорт министиэристибэтин, Култуура министиэристибэтин уонна Саха сирин сүүмэрдэммит хамаандаларын бэлэмниир киин сакааһынан уһуллар. Киинэ режиссерунан Михаил Лукачевскай анаммыт, сценарий ааптара Алексей Амбросьев – Чоох Мунду. Оттон Коркин оруолун Иннокентий Луковцев толоруоҕа.

Бу киинэ биир сүрүн уратыта көмпүүтэр көмөтүнэн оҥоһуллар спецэффектары туһанан, 1976 сыллаахха Монреаллааҕы Олимпиадаҕа буолбут түгэннэри көрдөрүү буолар. Онон бэрт уустук үлэ оҥоһуллара күүтүллэр. Киинэ 2023 сылга тахсара күүтүллэр.