Улуу убайбыт барахсан

Бүгүн, кулун тутар 1 күнүгэр, биһиги, Оһуокай уопсастыбата ыар сүтүктэннибит. Халыҥ хаххабыт, дурдабыт Афанасий Егорович Алексеев бу орто дойдуттан букатыннаахтык барда.

Кини туһунан үтүө тыл хаһан да тохтуо суоҕа, холобур быһыытынан тутта сылдьыахпыт. Афанасий Егорович киһиэхэ барытыгар тэҥ сыһыаннаах, олус холку, дириҥ көҕүстээх этэ. Дьокуускай куоракка горисполком бэрэссэдээтэлинэн үлэлии сылдьан элбэх киһиэхэ кыбартыыратыгар тиийэ туруорсар этим диэччи. Кимиэхэ да аккаастаабат этим, киһиэхэ хайаан да болҕомто уурулоуохтаах диэччи.

Мин 2010 сылтан Оһуокайга үктэниэхпиттэн, Афанасий Егорович мэлдьи истиҥник кэпсэтэрэ, өрө тутара. Оһуокай сүбэтигэр кини этии киллэрэн, кэмпириэнсийэ  буолбутугар бэрэссэдээтэли солбуйааччынан тыл киллэрбитэ.
Мин кини туһунан суруналыыс быһыытынан хас да ыстатыйаны суруйбутум. Толло саныыр буолан, наһаа иҥэн-тоҥон ыйыталаспат этим. Ол эрэн мунньахтарга тыл этэрин истэр буолан, санаатын син таба таайан суруйар этим. Аҕыс сааспыттан үҥкүү тылын этэрин этээччи. Үгүс дьонтон ыйыттахпына, бары орто омурҕаннарын ааһан баран этэллэр эбит диэччи.
2022 сыллаахха Үөһээ Бүлүүгэ олоҥхо ыһыаҕар дархаттар ыһыах бастакы күнүттэн оһуокайдаабыттара. Онно Афанасий Егорович 90 сааһыгар үктэммит эрээри, уһун тыыннаах этээччи буоларыттан саллыбытым. Кыра, симик куоластаах эрээри, балтараа чааһы быһа этэриттэн, кынаттаһа сылдьан саллыбытым. Маҥнай үтүктэн иһэн, күөмэйим кычыгыланан, сатаан батыспакка, ыксаан, киһибин түһэн биэриэм диэн,сөтөллөн, дьэ онтон аһыллан, чөллөрүйэн, бүтүөр диэри кынаттаспытым уонна Олоҥхо ыһыаҕын үөрүүтүн ылыммыттыы, хайдах эрэ чэпчээн, сырдаан хаалбытым. Бу улахан этээччигэ кынаттаһан, арааһа түһэн биэрбэтэхпиттэн киэн тутуннаҕым.
Афанасий Егорович өрөбүллээҕи Оһуокайбытыгар мэлдьи кэлээччи уонна эн саҕалаа диэн, эбэһээт кынаттаһааччы.
2023 сыллааҕы Үс Хатыҥ ыһыах оһуокайын Афанасий Егорович үрдүк аатыгар анаан ыыппыппыт. Бу сылга киниэхэ АЛРОСА хампаанньа саамай бөдөҥ алмаас тааска кини аата иҥэрбитэ. Хата, улуу киһибит тыыннааҕар бу үрдүк аат иҥэрилиннэ диэн, олус киэн туттубуппут.
Афанасий Егорович спорка эмиэ улахан өҥөлөөх салайааччы быһыытынан биллэр. Кини Австралияҕа Сидней куоракка уонна Афиныга ыалдьыт быһыытынан олимпийскай оонньууга ыҥырыллыбытын кэпсээччи уонна онно сылдьан оһуокайы түһүлгэлээн эппитин киэн тутта этээччи.
Манчаары спартакиадатын тыа сирин дьонугар маҥнайгынан тэрийбит салайааччы буолар. Саха сиригэр Арассыыйа тустууга чемпионатын тэрийээри, Москваҕа Кремльгэ гостиницаттан эрдэ тахсан, түөрт ааны хас да төгүл аһан, кэмниэ кэнэҕэс ол түөрт аантан алҕаска киирэн хаалан, ССКП КК секретара Михаил Сусловка киирэн, тылын ылыннарбытын, биирдэ пааркаҕа кэпсиирин түбэһэн истибитим.
2024 сыл балаҕан ыйыгар диэри телефонунан кэпсэтэ турбутум, онно кини ээ үчүгэйбин  диэхтээбитэ. Ол кэпсэтии кэнниттэн, төлөпүөнэ арахсан хаалбыт этэ.
Афанасий Егорович санааны түһэрбэккэ, инниҥ диэки баран иһиэхтээххин,  айбыт айыыларбыт хаһан харайан баралларынан, суох буоллахпына, хомойуом суоҕа диэхтиирэ. Бырастыы, быдан дьылларга! Эн турууласпыт Оһуокайыҥ түмсүүтэ өссө күүскэ сайыннын!

Марта Николаева