Улуус баһылыга оҕолору кытта саахыматтаата

Өлүөхүмэ улууһун баһылыга Николай Харбин ааспыт нэдиэлэҕэ улуус нэһилиэктэринэн үлэтин кэмигэр, Хоро нэһилиэгин үөрэнээччилэригэр биир кэмнээҕи оонньууга саахымакка сеанс биэрдэ.

“Уруккуттан саахыматы улууспар сайыннарар санаалааҕым. Ол эрээри, быыс булбакка, оҕолору кытта кыайан көрсүбэккэ сылдьыбытым, эбиитин дьаҥ даҕаны мэһэйдээбитэ. Дьаҥ бүтэн күрэхтэһиилэр саҕаламмытын кэннэ хоролор улуус күрэхтэһиитигэр ыҥырбыттарын кыайан кыттыбатаҕым. Сыллата массыына суола хаалыан иннинэ нэһилиэктэринэн үлэлиир үгэстээхпин. Ол сырыым кэмигэр хайаан даҕаны саахыматтыахпыт диэн эрэннэрбиппин толорон сеанс биэрдим.

Оҕолор саахыматтыылларын көрөн үөрдүм, биллэн турар, өссө дьарыктаналлара ирдэнэр. Уопсайынан, кыахтаахтарын бэлиэтии көрдүм. 6 саастаах Ярослав Акимов толкуйдатан ылла. Инникитин араас садаачалары суоттаан ньымаларын сайыннарыахтарын наада эбит. Ити туһунан дьарыктыыр дьонугар, оҕолорго бэйэлэригэр даҕаны сүбэлээтим. Тус бэйэбэр саахымат билимҥэ да үлэбэр көмөлөспүтэ, билиҥҥи даҕаны үлэбэр толкуйдуурбар кыаҕы биэрэр. Эһиил эмиэ хатылыах буолан сүбэлэстибит, таһымнара лаппа үрдүө диэн сабаҕалыыбын. Инникитин атын даҕаны оскуола үөрэнээччилэрин кытта оонньуур баҕа санаалаахпын”, — диэн баһылык санаатын үллэһиннэ.

Санатан эттэххэ, Николай Харбин бэйэтэ өссө алын кылааска үөрэниэҕиттэн саахыматтыыр. Алтыс кылааска үөрэнэр сылыгар улууска оҕолорго чөмпүйүөннээн турар. Итинтэн салгыы номнуо улахан дьону кытта оонньуур буолбута. Университекка үөрэнэр сылларыгар тохтуу сылдьан баран, бүтэрэр сылыгар Универсиадаҕа университет хамаандатыгар киирэн, бэйэтин дуоскатыгар бастаабыттаах. Саха сиринээҕи билим киинигэр үлэлиир сылларыгар Идэлээх сойуустар тэрилтэлэрин икки ардыларынааҕы күрэхтэһиилэргэ оонньуура, хамаанда хапытаана этэ.

Өрөспүүбүлүкэҕэ саахыматы киэҥник сайыннаран эрэллэриттэн үөрэрин биллэрэр. Өй муҥутуур оонньуутунан билиниллибит көрүҥү төрөөбүт улууһугар тарҕатар былааннаах.

Оскуолатааҕы сылларыгар саахымат хонуутугар уһуйбут тириэньэрэ Иннокентий Иннокентьевич Егомин быйыл 80 сааһынан сибээстээн аһаҕас турнир ыытыллар. Педагог уонна уһуйааччы сылынан тириэньэригэр махталын биллэрэр, бу күннэргэ буолар турнирга кыттар былааннаах.