Хаартыскаҕа Алексей Слепцов түһэриитэ
Кулун тутар 29 күнүгэр Чурапчы сэлиэнньэтин П.Е.Барахсанов аатынан сынньалаҥ паркатыгар «Аҕа күрэҕэ — 2023» өрөспүүбүлүкэтээҕи күрэскэ кыттар быраабы ылар иһин сүүмэрдиир күрэхтэһии буолла.
Барыта 11 хамаанда илин-кэлин түһүстэ. Халлаан хаардыы даҕаны турдар, бу олус интэриэһинэй күрэхтэһиини көрө элбэх киһи муһунна. Эҕэрдэ тылы улуус дьаһалтатын баһылыгын социальнай боппурулстарга солбуйааччы Мария Кронникова, Чурапчы нэһилиэгин баһылыгын солбуйааччы Уйгулан Туласынов, күрэхтэһии кылаабынай судьуйата Иван Лукин эттилэр.
Күрэс бастакы көрүҥүнэн ойбон алларыыта буолла. Аҕа анньыынан алларар, уол муус ыраастыыр. Маныаха 44,5 сөк. ойбону тэһэн Болтоҥоттон Кривошапкиннар (аҕата Яков, уола Миша) бастаатылар, иккис Чурапчы нэһилиэгин Куоҕалы түөлбэтиттэн Аммосовтар (Ньургун, Тимур), үһүс Арыылаахтан Демьяновтар (Марк, Алеша) буоллулар.
Иккис көрүҥ — чэй оргутуута. Судьуйалар биэрбит мастарын хайытан, саһаҕа бэлэмнээн, оттон солуурдаах ууну оргутуохтааххын. Кривошапкиннар уулара бастакынан оргуйда, иккис Аммосовтар, үһүс Чурапчы нэһилиэгин «Чараҥ» түөлбэтиттэн Баранкевичтар (аҕата Андрей, уола Андрей) буоллулар.
Остуолбаҕа ыттыыга эмиэ Кривошапкиннар бастаан балаһыанньаларын лаппа тупсардылар. Иккиһи Кытаанахтан Собакиннар (Иван, Ньургун), үсүһү Аммосовтар ыллылар.
Туут хайыһарынан сүүрүүгэ хаар сииктээх буолан күчүмэҕэйдэри көрүстэллэр даҕаны, бары биэтэги буллулар. Бастакы — Демьяновтар, иккис — Аммосовтар, үһүс — Кривошапкиннар.
Бу көрүҥнэр кэннилэриттэн миэстэтигэр эбиэт тэриллэн кыттааччылар, көрөөччүлэр сибиэһэй салгыҥҥа үөрэ-көтө аһаатылар.
Эбиэттэн киэһэ мас суоруутугар, эрбээһиҥҥэ, хайытан саһааннааһыҥҥа лидердэр эмиэ инники сырыттылар. Ол курдук суорууга Демьяновтар, Аммосовтар, Кривошапкиннар, эрбээһиҥҥэ Аммосовтар, Кривошапкиннар, Собакиннар, хайытан саһааннааһыҥҥа Баранкевичтар, Аммосовтар, Кривошапкиннар инникилээтилэр.
Онон уопсай түмүккэ Кривошапкиннар кыайыылааҕынан таҕыстылар, иккиһи Аммосовтар, үсүһү Демьяновтар ыллылар.
Кыайыылаахтар харчынан сэртипикээтинэн, бириистэринэн наҕараадаланнылар, улуус аатыттан өрөспүүбүлүкэтээҕи күрэхтэһиигэ кыттар чиэстэннилэр.
Алексей Слепцов,
Чурапчы.
Бу ураты каарта оҕолорго төрөөбүт дойдуларын дириҥник өйдүүргэ уонна умнуллубат өйдөбүллэри бэлэхтиэҕэ. Манна Саха сирин…
Соторутааҕыта Ыксаллаах быһыы-майгы министиэристибэтин 35 сылыгар аналлаах тэрээһин Уһук Илин бастыҥ баһаарынайдарын түмтэ. Бу туһунан…
От ыйын 3 күнүттэн 5 күнүгэр диэри Нерюнгрига өрөспүүбүлүкэтээҕи Олоҥхо ыһыаҕа ыытылларынан сибээстээн, арыгыны атыылааһыҥҥа…
От ыйын 4-8 күннэригэр Дьокуускайдааҕы VIII норуоттар икки ардыларынааҕы киинэ бэстибээлэ ыытыллыаҕа. Быйылгы бэстибээл сүрүн…
Бүгүн Мииринэй оройуонугар баар «Саха сирин тыыннаах алмаастара» пааркаҕа («Живые алмазы Якутии») пааркаттан үөрүүлээх сонун…
Өлүөхүмэҕэ саҥа оҕо поликлиникатын үөрүүлээхтик астылар. Урут поликлиника 1980-с сыллардааҕы дьиэҕэ баар эбит. Билигин тэрилтэҕэ…