Улуус салалтата айылҕа иэдээнин кэнниттэн чөлүгэр түһэрии үлэтин ыытарга бэлэмнэнэр

Сотору кэминэн Өймөкөөн улууһа улахан ууттан босхолонно да, айылҕа иэдээнин хоромньутун ааҕыы-суот саҕаланыаҕа.

Бу күннэргэ «Өймөкөөн улууһа» МТ дьаһалтата тустаах министиэристибэлэринэн сылдьан, үп-харчы докумуоннарын толрууга үлэлэстэ.
«Сокуон быһыытынан, ыксаллаах быһыы-майгы эрэсиимэ биллэриллибитин кэнниттэн үс күн иһигэр бүддьүөттэр икки ардыларыгар үп-харчы хамсааһыныгар анал сайаапка оҥоһуллуохтаах. Ол суолталаах докумуону бу күннэргэ оҥорон туттардыбыт. Ол кэнниттэн уу түстэҕинэ, хоромньуну толуйууга сыһыаннаах аакталары толоруу барар. Онно олоҕуран, симиэтэ оҥоһуллар уонна көмө харчыта эмсэҕэлээччилэргэ тиэрдиллэр. Онон үп-харчы эргииригэр сыһыаннаах докумуон силигин ситтэ.
Маны таһынан, тырааныспар миниистирэ Владимир Сивцеви кытта көрсөн, суол-иис, муоста өрөмүөнүн боппуруостарын ырыттыбыт. Тутуу уонна ОДьКХ министиэристибэлэринэн сылдьан үлэ ыытылынна.

Киин куоракка Өйөбүл ыстаабы үлэлэтэ олорор биир дойдулаахтарбытын кытта көрсөн санааларын иһиттибит. Маладьыас дьон, көстөр уустуктары тута быһаара олороллоро үөртэ. Өймөкөөн улууһун урбаанньыттара уонна таксистара төрөөбүт дойдуларыгар бэриниилээхтэрин көрдөрөн, бары биир киһи курдук түмсэн үлэлии сылдьалларын көрөн, киһи киэн туттар.
Киин куоракка докумуону кытта үлэлэһэн баран, бүгүн Томторго айаннаатыбыт. Онно тиийэн анал хамыыһыйалар үлэлэрин сүрүннүөхпүт.

Өймөкөөн улууһун олохтоохторун аатыттан Ил Дархан Айсен Николаевка, СӨ Бырабыыталыстыбатын Бэрэссэдээтэлин солбуйааччы Дмитрий Садовниковка, СӨ Гражданскай оборона дьыалаларын уонна дьон олоҕор куттал суоһаабатын хааччыйыы миниистирэ Дмитрий Лепчиковка саамай уустук кэмнэр саҕаланыыларыттан тустаах тэрээһин үлэни ыыта олороллоругар, сүрүн болҕомтону Өймөкөөн улууһугар ууран, чөлүгэр түһэрии үлэтин боппуруостарыгар үлэлэһэ сылдьалларыга махтал истиҥ тылларын аныыбыт. Өрөспүүбүлүкэбит улуустарыттан, биирдиилээн дьонтон күн аайы көмө киирэ турар. Саха дьоно өбүгэ саҕаттан бэйэ-бэйэбитин өйдөһөр, өйөһөр, көмө оҥорууга илиибитин утары уунар үөрүйэхпит айылҕа иэдээнигэр түбэспит дьон санааларын угуттуур, күүс эбэр. «Норуот күүһэ — көмүөл күүһэ» диэн мээнэҕэ этиллибэт. Махтал, бар дьоммут эһиэхэ! Өрүү бу курдук түмсүүлээх буолуохха!» — диэн бэлиэтээтэ Өймөкөөн улууһун баһылыгын 1-кы солбуйааччы Алексей Федотов.