Улууспут балыыһатыгар махталым муҥура суох

Таатта улууһугар үгүс саҥа тэриллэринэн хааччыллыбыт аныгы поликлиника үлэҕэ киирэн, олохтоохтор олус абыранныбыт. Улуус балыыһатын кылаабынай бырааһа,  СӨ үтүөлээх бырааһа Сардаана  Владимировна Кононова кэскиллээҕи өтө көрөн үлэлиир дьоһуннаах салайааччынан буолар. Бу поликлиника үлэҕэ киириитин сэргэ, доруобуйа харыстабылыгар үлэлээбит бары үлэһиттэр ааттара үйэтитиллэр дириҥ ис хоһоонноох искибиэр  аһыллыбыта.

Мин бу күннэргэ «Таҥара дьону  быыһаа диэн ыыппыт хирура» диэн уос номоҕор ахтыллар Иван Викторович Константинов аатын сүгэр хирургия үлэтин билистим. Хирургия доруобуйа харыстабылын хорук тымыра диэн этэллэрин илэ көрөн итэҕэйдим. Дьиэтэ-уота тупсаҕайа, ырааһа. Үлэһиттэрэ сайаҕастарын, кыһамньылаахтарын, ыарыһахтары оҕолуу бүөбэйдииллэрин көрөн олус астынным.

Уопуттаах хирурдар: салаа сэбиэдиссэйэ, иккис категориялаах хирург Алексей Петрович Семенов; үрдүк категориялаах хирург Татьяна Петровна Посельская; хирург  Гаврил Гаврильевич Колодезников, ону сэргэ  анестезиолог-реаниматологтар Семен Петрович Эляков, Иван Иванович Соловьев биир хамаанданан, сүбэнэн олус бэркэ үлэлии сылдьаллар. Түүннэри-күнүстэри ыалдьар киһини чөлүгэр түһэрэр туһугар туруулаһаллар. Быйыл сайын  хас  да олус ыарахан түгэннэргэ сөптөөх эппэрээссийэлэри оҥорбуттарын куораттааҕы биир идэлээхтэрэ  хайҕаан кэпсэтэр сурахтарын истэн, хирурдарбытынан киэн тутуннум.

Бэйэбит уолбут, Уус Тааттаттан төрүттээх Гаврил Гаврильевич Колодезников иккис сылын олус бэркэ үлэлии сылдьар. Хас биирдии ыарыһахха наһаа болҕомтолоох сыһыаннааҕын, оннооҕор күн аайы оҥоһуллар бэрэбээскилэри бэйэтинэн көрөн-истэн  оҥорторорун көрөн, олус астынным. Эдэр киһи кэскилэ иннигэр, үүнэн-сайдан иһиэ, аата ааттанар хирург буолуо диэн эрэл санаа кыыма уһугунна.

Сиэстэрэ кыргыттар   түргэн-тарҕан, ыраас туттунуулаахтар, эйэҕэс сыһыаннаахтар. Хайа төрүөҕүттэн билэр оҕом, эдэр сылдьан Харбалаахха дьукаах олоро сылдьыбыт ыалым Наталья, Виктор Тистяховтар кыыстара Наталья Викторовна Федорова бэрэбээски оҥорор сиэстэрэ эбит. Хара маҥнайгыттан наһаа истиҥник көрсөн, сылаастык сыһыаннаһан, ыарыыбын үмүрүттэ.

Санитаркалар үлэлэригэр эппиэтинэстээхтик сыһыаннаһаллара хирургияҕа киирээти кытта көстөр, ыраас, сырдык балааталар, хостор ыарыһах түргэнник үтүөрэригэр көмөлөһөргө дылылар.

Балыыһа аһа кэмигэр оруобуна бэриллэр, минньигэс, тотоойу.

Онон бу эйэлээх кэлэктиип улууспут дьонун араҥаччылаан, эмтээн-томтоон, инникигэ эрэли үөскэтэр үлэлэрэ өссө ситиһиилээх буоллун, үгүс киһи махтала бэриниилээх үлэҕэ кынаттыы турдун диэн баҕа санаам бастыҥын анаатаҕым буолуохтун.

Валентина КРИВОШАПКИНА,

Таатта, Харбалаах