Улуустааҕы «Үрдэл» күрэх

Ыам ыйын 19 күнүгэр Тааттаҕа оскуола үөрэнээччилэригэр Арассыыйаҕа Аҕа дойдуну көмүскээччи,  Саха Өрөспүүбүлүкэтигэр Ийэ дойдуну көмүскээччи уонна Улуу Кыайыы 80 сылыгар аналлаах улуустааҕы «Үрдэл» күрэҕэ буолла.

Улуус оскуолаларыттан оҕо тэрилтэлэрэ көхтөөх кыттыыны ыллылар, ол курдук Туора Күөлтэн «Уолан», Уолбаттан “Мээчиктэр”, Дьохсоҕонтон «Кэскил», Игидэйтэн «Сайдам им. Нажима Нестерова», Ытык Күөл 2 №-дээх орто оскуолатыттан “Албан” хамаандалар күрэхтэстилэр.

Хамаандалар 10 араас хайысханан күрэхтэстилэр: хамаанданы билиһиннэрии, комбинированнай эстафета, строевой хаамыы, строевой ырыа, автоматы ыһыы, хомуйуу, баһаартан сэрэхтээх буолуу эстафетата,  «Тулалыыр эйгэ экологията», «Бэргэн ытааччы», «Куттала суох суол», «Уот охсуутугар бастакы көмө», быыһааччы-баһаарынньыктар эстафеталара.  Күрэхтэһиилэри куруутун бииргэ үлэлэһэр партнердарбыт тэрийэн ыыттылар. Кыайбыт хамаандалары, ситиһиилэммит оҕолору бэйэлэрэ тэрилтэлэрин ааттарттан наҕараадалаатылар.

Уопсай түмүгүнэн улуустааҕы “Үрдэл” оонньуу кыайыылаахтарынан буоллулар: 1 миэстэ — Туора Күөл орто оскуолатын «Уолан» хамаандата, 2 миэстэ — Ытык Күөл 2 №-дээх орто оскуолатын “Албан” хамаандата, үһүс миэстэҕэ Уолба орто оскуолатын “Мээчиктэр” хамаандата таҕыста.

“Үрдэл” оонньуу олус тэтимнээхтик, интэриэһинэйдик, түмсүүлээхтик ааста. Бары кыттыбыт оҕолорго, салайааччыларга махтанабыт. Сылын ахсын көмө буолар партнердарбытыгар: Тааттатааҕы үөрэҕирии салалтатыгар, 32 №-дээх “Таатта улууһа” СӨ ОГПС, РЭС, СӨ ГАУ “Якутлесресурс”, “Лесничество” Тааттатааҕы филиалыгар, РФ ИДьМ Таатта улууһунааҕы отделениетыгар, Таатта улууһунааҕы РФ ИДьМ Госавтоинспекциятын отделениетыгар, Таатта улууһунааҕы айылҕа харыстабылын инспекциятыгар, “Бастакылар хамсааһыннара” олохтоох салаатын Сэбиэтигэр улахан махталбытын этэбит.

Таһаарыылаах, түмсүүлээх үлэбит үгүс оҕону тарда, улууспут сайдыытыгар төһүү күүс буола турдун!

Тааттатааҕы «Сатабыл» оҕо айымньытын дьиэтэ.