Улуустарга 40 киинэ саалата аһыллыаҕа

Саха сиригэр «Экстра Синема» диэн оҥорон таһаарар-хомуйар сыах үлэтин саҕалаата. Сыах күҥҥэ 15 проекторы, сылга 5 тыһыынча устууканы оҥорон таһаарар кыахтаах. Саҥа проектордары улуустарга, нэһилиэктэргэ тарҕатыахтара. 

Алтынньы 4 күнүгэр араас улуустарга  40 киинэ саалата тэҥинэн аһыллыахтара. Ол курдук, Амма, Аллайыаха, Бүлүү, Үөһээ Бүлүү, Горнай, Эдьигээн, Кэбээйи, Нам, Ньурба, Мэҥэ Хаҥалас, Муома, Өймөкөөн, Сунтаар, Таатта, Томпо, Уус Алдан, Хаҥалас, Чурапчы, Эбээн-Бытантай олохтоохторо саҥа киинэлэри улахан экрааҥҥа көрөр буолуохтара.

«Экстра Синема» генеральнай дириэктэрэ Петр Чиряев этэринэн, 40 киинэ саалата арылыннаҕына, кыра дэриэбинэлэргэ 70-тан тахса киһи улахан экрааҥҥа  киинэ көрөр кыахтанар. Кинилэр проектордарын уратыта диэн — ханнык баҕарар тыа кулуубугар көрдөрүөххэ сөп. Маны тэҥэ, анал тэрил сыаната 1 мөлүйүөн солуобайтан үрдээбэт, бу омук тэриллэрин сыаналарыгар тэҥнээтэххэ, биэс төгүл чэпчэки.

Бу тэрил билиэттэри атыылыыр уонна «Пушкин каартата» систиэмэҕэ холбонор кыахтаах, сыыппара көүрүҥүнэн киинэлэри көрдөрөр. Кулууп, саала, кириэһилэлэр, интэриниэт баар буолла да, көрдөрөр. Аны туран, интэриниэт түргэн буолара ирдэммэт. Онон тыа сиригэр саамай табыгастаах, онно ананан оҥоһуллубут тэрил буолар.

2022 сылтан бырайыак Саха сиригэр үлэлиир. Билиҥҥитэ өрөспүүбүлүкэҕэ 30 киинэ саалата үлэлии турар.

2023 сыл ыам ыйыгар Владимир Путин Ходынкаҕа «Зотов» кииҥҥэ култуурунай-үөрэтэр кластерга сылдьан, «Экстра Синема» хампаанньа истиэндэтин көрөн баран, бу проектордары Арассыыйаҕа тарҕатар, кыра сэлиэнньэлэргэ киинэ тыйаатырдарын тэрийэр туһунан идиэйэни өйөөбүтэ.

Ааспыт сайын бырайыакка Национальнай технологическай көҕүлээһин статуһа иҥэриллибитэ, онон  «Спутник — Управление активами НТИ» ХЭТ кытта дуогабардаһан, бырайыагы үбүлээһин быһаарыллыбыта. Бырайыагы Ил Дархан, СӨ бырабыыталыстыбата өйүүллэр.