Улуустарга кэпсии-быһаара барыахтара

Бүгүн СӨ Тыатын хаһаайыстыбатын уонна аска-үөлгэ бэлиитикэтин министиэристибэтигэр иккис күнүн улуустааҕы, куораттааҕы уокуруктарга бэриллибит боломуочуйанан сэминээр-сиэссийэ ыытылынна. Бүгүҥҥү стратегическай сиэссийэни министиэристибэ Экэниэмикэҕэ уонна стратегическай былааннааһыҥҥа департаменын салайааччыта Инна Оконешникова, Үүнээйини, сири оҥорууну уонна мелииорацияны сайыннарыыга  департаменын салайааччыта Вячеслав Гаврильев иилээн-саҕалаан ыыттылар.

Биллэрин курдук, быйыл субвенциялары 34 оройуоҥҥа уонна 2 куораттааҕы уокурукка 14 хайысханан 3 тус сыаллаах ыстатыйанан ыытыахтара. 14 хайысхаҕа киирсэллэр: сүөһү иитиитин көмөлтө  кэтэх хаһаайыстыбалары өйөөһүн, сүөһү иитиитин, сибиинньэни иитиини, сылгыны үөрдээн иитини, хотугу дьиэ табатын иитиитин сайыннарыы, оҕуруот аһын үүннэриини, хортуоппуйу олордууну, бурдугу үүннэриини сайыннарыы, үүтү, ынах, сылгы этин оҥоруу, хортуоппуй, оҕуруот аһын соҕотуопката, бурдугу үүннэрии.

Тустаах сэминээр сахалыы ыытыллан, дьүүллэһии-кэпсэтии сэргэхтик барда. Ол курдук, Өлүөхүмэ, Сунтаар, Мииринэй, Мэҥэ Хаҥалас уо.д.а. тыа хаһаайыстыбатын управлениеларыттан көхтөөх түк кытыннылар.

Министиэристибэ Экэниэмикэ уонна стратегическай былааннааһын департаменын салайааччытын солбуйааччы Парасковья Иванова сокуон бырайыагын киэҥник дьүүллэһии  түмүгэр киирбит этиилэринэн бэриллибит боломуочуйалары олоххо киллэрии мэхэньиисимин уларытыыга  учуоттаммыт түгэннэргэ тохтоото. Холобура, оройуоннар уонна куораттааҕы уокуруктар олохтоох салайыныы уорганнарыгар субсидиялар көрүҥнэригэр өйөбүл тумус тутуллар хайысхаларын талар кыах бэриллэр. Киирбит уларыйыылары учуоттаан, олохтоох салайыныы уорганнара бэйэлэрин муниципальнай тэриллиилэрин уонна куораттааҕы уокуруктарын сайдыытын стратегиятын чэрчитинэн тыа хаһаайыстыбатын сайдыытын тумус тутуллар хайысхаларын киэҥник дьүүллэһиэхтээхтэр. Тыа хаһаайыстыбатын сайдыытын орто болдьохтоох бырагырааматын ылыныахтаахтар эбит. Статистиканы кытта ыкса үлэлиэхтээхтэрэ этилиннэ. Холобура, мэҥэ хаҥаластар быйыл үүт соҕотуопкатын кээмэйин улаатыннарар баҕалаахтар, онон 65-тии солкуобайынан ааҕан, 162 мөл солк. көрдөөрү гыналларыгар атын категориялартан аччаппакка эрэ эбии кээмэйгэ киирсиҥ диэн сүбэлээтилэр.

Улуустар бэрэстэбиитэллэрэ ыйытыыларын кэнниттэн сокуон саҥа мэхэньиисиминэн үлэлээһин бастакы сыла буоларын чопчулаатылар. Оробуочай бөлөхтөр тэриллиэхтэрэ. Билигин министиэристибэ исписэлиистэрэ улуустарынан быһаара-кэпсии бараары сылдьаллар.