Ульяна Попова: «Сунтаардар көхтөөхтүк кытталлар»

Өрөспүүбүлүкэҕэ барытыгар курдук, Сунтаар улууһугар быстах хомуурунан анал байыаннай эпэрээссийэҕэ кыттар дьоммут дьиэ кэргэттэригэр көмөлөһөр анал киин, нэһилиэктэргэ ыстааптар, улуус дьаһалтатын ыччат бэлиитикэтигэр салаатын иһинэн биир дойдулаах саллааттарыгар туох кыалларынан өйүүр ыстааптар тэриллэннэр үлэлии туралларын туһунан Сунтаар улууһун дьокутааттарын Сэбиэтин бэрэссэдээтэлэ Ульяна Попова кэпсиир:

— Быстах хомуурга ыҥырыллыбыт уонна хантараагынан анал байыаннай эпэрээссийэҕэ кытта сылдьар улууспут олохтоохторун өйүүр сыалтан, улуус дьаһалтата бу эйгэҕэ социальнай өйөбүл дьаһалларын ылыммытынан, нэһилиэнньэни түмэн үлэ бара турар. Ол курдук, үбүнэн көмө: саллааттарга 50 тыһыынча солкуобайдаах биир кэмнээх төлөбүр олохтонон, 102 байыаннай сулууспалаахха, ол иһигэр хантараагынан уонна атын байыҥкамааттартан ыҥырыллан барбыттарга кытта бэрилиннэ; ити саллааттарбыт дьиэ кэргэттэригэр 15-тии тыһыынча солкуобай көрүллэн, күн бүгүн 114 дьиэ кэргэн бу харчыны ылла — олортон 27 атын байыҥкамаатынан сулууспаҕа ыҥырыллыбыт байыас дьиэ кэргэнэ итиэннэ 4 бэйэлэрин баҕаларынан анал байыаннай эпэрээссийэҕэ кытта сылдьар байыас дьиэ кэргэнэ; улуус нэһилиэктэрин дьаһалталара (Аллаҥа, Бордоҥ, Кириэстээх, Куокуну, Кэмпэндээйи, Түбэй-Дьаархан, Устье, Элгээйи) 38 дьиэ кэргэҥҥэ уопсайа 112541 солкуобай суумалаах матырыйаалынай көмөнү оҥордулар.

Нолуокка уонна нолуога суох чэпчэтиилэргэ маннык өйөбүл көрүҥнэрэ олохтоммуттара: күн бүгүн 40 киһи сир учаастагын (муниципальнай эбэтэр судаарыстыбаннай) түүлээһин төлөбүрүттэн уонна түүлэһии иһин кыайан төлөөбөтөх иэһиттэн босхолонно; сир нолуогуттан босхолооһун уонна биирдиилээн дьоҥҥо бас билии баайыттан тутуллар нолуокка чэпчэтиилэри олохтооһуҥҥа билигин нэһилиэктэр дьокутааттарын Сэбиэттэрэ бу нолуоктартан босхолуур туһунан быһаарыыны ылынан олороллор.

Үөрэхтээһин эйгэтигэр ылыллыбыт өйөбүл миэрэлэрин чэрчитинэн 49 төрөппүт оскуола хомуйар усунуоһуттан босхолонно, 5-11 кылааска үөрэнэр саллаат оҕолоругар — 22 оҕоҕо босхо аһылык көрүллэр.

Улуус 180 олохтооҕо бөһүөлэк иһинээҕи тырааныспарынан босхо айанныыр кыахтаах. Маны сэргэ, араас култуурунай тэрээһиннэргэ чэпчэтиилэр, үлэҕэ киириигэ анаан доруобуйа туругун киин балыыһаҕа босхо көрдөрүү, оҕо саадыгар, санаторийга уо.д.а. барыыга  анаалыстары босхо туттарыы, тырааныспары ыытыыга көҥүлү ылар сыаллаах доруобуйа туругун чинчийтэриигэ, саа-сэп илдьэ сылдьыыга көҥүлү ылыыга 50%-наах чэпчэтии уо.д.а. көрүллэр.

Улуус дьаһалтатын тэрээһининэн «Спецназ добра» баҕа өттүнэн көмөлөһөөччүлэр хамсааһыннарын чэрчитинэн волонтердар көмөлөрө оҥоһуллар. Ону сэргэ улуус уопсастыбаннай Сэбиэтин иһинэн саллааттарбытыгар наадалаах мал-сал хомуллар. Улууска дьахталлар сүбэлэрин күүһүнэн төгүрүк остуоллар, быраап уонна уйулҕа эйгэтигэр биирдиилээн дьоҥҥо сүбэлэр бэриллэллэр.

«Арассыыйа ийэлэрэ» Арассыыйатааҕы хамсааһын Сунтаардааҕы салаатынан улуус ийэлэриттэн, эбэлэриттэн сылаас таҥас хомуллубута; «Алмаасэргиэнбаан» Сунтаардааҕы филиалын көмөтүнэн бу дьиэ кэргэттэрбитигэр анаан үп өттүгэр билиилээх буолууларыгар сэминээрдэр ыытыллаллар, дьиэ кэргэҥҥэ туох наадатынан көрөн, улуус тэрилтэлэрэ, үлэһиттэрэ сыһыарыллан үлэлии сылдьаллар.

Улууспут хас биирдии нэһилиэгэр саллааттарбыт дьиэ кэргэттэрин өйүүр үлэ ыытылларыгар анаан волонтердар ыстааптара тэриллэн үлэлииллэр. Бүгүҥҥү туругунан Сунтаар улууһугар 80 волонтёр араас көмөнү оҥорууга сүүрэ-көтө сылдьар, барыта 300 тимуровскай үлэнэн көмө араас көрүҥэ оҥоһулунна.

Алтынньы 18 күнүттэн улууска гуманитарнай көмөнү тутар пуун аһыллан үлэлиир. Хомуллубут көмө үксэ тиэрдиллибитэ. Бу көмө аахсыйаларыттан ким да туора турбакка, бары көхтөөхтүк кытталлара биһирэнэр.