«Умнас» эрэгийиэннээҕи суол хапытаалынай өрөмүөнэ Өлүөхүмэ куораты тупсарыаҕа

«Умнас» эрэгийиэннээҕи  суолу хапытаалынай өрөмүөннээһин үлэтэ  «Хаачыстыбалаах, куттала суох суоллар» национальнай бырайыак чэрчитинэн ыытыллар. Үлэ хаамыытын Өлүөхүмэҕэ  оробуочай сырыытын кэмигэр Ил Дархан Айсен Николаев билистэ.

Уопсай өрөмүөннэнэр суол уһуна — 7,5 км. Билиҥҥи туругунан бетон бүрүөһүнү тэлгээһин үлэтэ ыытылла турар. Ону сэргэ тротуардары, уу лотуоктарын уонна оптуобус суолтан киирэн тохтуур сирдэрин оҥороллор.

-«Умнас» суол Өлүөхүмэ куоратын киин уулуссата буолар. Бу суол туруга олус мөлтөх этэ. Ааспыт сылтан суолу оҥоруу үлэтэ саҕаламмыта. Бэдэрээтчит этэринэн, болдьоммут кэмигэр үлэ туттарыллыахтаах. Бу олус суолталаах суол. Онон суол оҥоһулуннаҕына үгүс суолталаах боппуруостар быһаарыллыахтара диэн эрэнэбин. Саамай кылаабынайа, дьон олоҕун хаачыстыбата тупсуо этэ, — диэн Айсен Николаев эттэ.

Суолу оҥорууну былырыын  «Дороги Олекмы» хампаанньа саҕалаабыта. Эбийиэги туттарыыны бу сыл алтынньытыгар былаанныыллар.  Бүгүҥҥү күҥҥэ суол үлэтин бэлэмэ 60%-ҥа тэҥнэһэр.

Маны сэргэ Ил Дархан Айсен Николаев «Солянка-Балаҕаннаах» кыһыҥҥы суол тутуутун билистэ. Бу суол тутуллан үлэҕэ киирдэҕинэ төгүрүк сыл устата Балаҕаннаахха диэри суол баар буолуохтаах.

Бэлиэтээн эттэххэ, бу саас Өлүөхүмэ оройуонугар биэс саҥа  оптуобус бэриллибитэ. Икки «Газель», үс «ПАЗ ВЕКТОР» оптуобус. Тиэхиньикэлэр кэлиилэрэ эрдэ тохтотула сылдьыбыт сырыыны-айаны сөргүттэ.