«Умнуллубат көмүс ырыалар»

Дьокуускайга А.Е.Кулаковскай аатынан норуоттар доҕордоһууларын дьиэтигэр «Умнуллубат көмүс ырыалар» кэнсиэр буолла. Дьон-сэргэ улаханнык биһирээтэ, астынна, сэргэхсийдэ. 

Саха эстрадатын биллиилээх ырыаһыттара 70-90-с сыллардааҕы ырыалары толордулар. Көрөөччүлэр хас биирдии ырыаны ытыстарын тыаһынан арыаллаатылар, ырыаны тэҥҥэ ылластылар. Кэнсиэри Валентина Чиркова салайан ыытта. Дьоро киэһээ ырыаны-тойугу көҕүлүттэн туттулар: Владимир Заболоцкай, Анастасия Готовцева, Екатерина, Алексей Егоровтар, Константин Мохначевскай, Александр Емельянов, Варя Аманатова, Вячеслав Попов, Владимир Индигирскэй, Исай Брызгалов, Владимир Татаринов, Сардана Осипова, «Сунтаар күөрэгэйдэрэ», Бүөккэ Бөтүрүөп, Степан Васильев, Афанасий Афанасьев, Святослав Эверстов, Николай Прокопьев, «Дьол» ВИА.

Кэнсиэргэ Константин Мохначевскайга дохсун ытыс тыаһыгар доҕуһуоллатан, «Үйэлээх ырыалар» бочуоттаах бэлиэ туттарылынна.

Түмүккэ көрөөччүлэр кэнсиэри тэрийээччилэргэ, ырыаһыттарга махтаннылар. «Сүрэҕи-быары ортотунан киирэр, киһини долгутар, үөрдэр олус үчүгэй, истиҥ ырыалары астына-дуоһуйа иһиттибит», — дэстилэр.

А.Е.Кулаковскай аатынан норуоттар доҕордоһууларын дьиэтин пресс-сулууспата