«Умный транспорт» сыһыарыы быстах кэмҥэ үлэлээбэт буолла

Бүгүн оптуобуһунан айаннаары, «Умный транспорт» мобильнай сыһыарыыны холбообутум, оптуобустар сырыыларын көрдөрбөт эбит. Дьиҥэ, бу оптуобустар ханна сылдьалларын, тохтобулга хас мүнүүтэнэн кэлэллэрин тута көрдөрөр олус туһалаах сыһыарыы буолар. Тохтобулга тоҥо-хата турбакка, оптуобус ханан иһэрин чопчу көрөн, бириэмэтин билэн тахсаҕын.

Дьокуускай куорат дьаһалтата иһитиннэрэринэн, олунньу 20 күнүгэр «Умный транспорт» сыһыарыы тохтуу-тохтуу үлэлиир буолбут. Бу «Ростелеком» хампаанньа сибээһин лииньийэтигэр тэхиньиичэскэй үлэлэринэн сибээстээн, итинник тохтобул тахсыбыт.

Бу сыһыарыы тохтуу-тохтуу үлэлиирэ олунньу 21 күнүгэр сарсыарда 10 аҥаар чааска диэри салҕаныаҕа диэн мээрийэҕэ иһитиннэрэллэр. Оптуобустар сырыыларын, бириэмэтин Дьокуускай куорат дьаһалтатын саайтыгар киирэн көрүөххэ сөп диэн куораттааҕы суол-тырааныспар сулууспата сэрэтэр.