Умуллубат уоту Мурманскайтан аҕаллылар

 Албан ааттаах ытык дьомут, хорсун буойуттар кэриэстэригэр умуллубат уот умайар. Умуллубат уоту Дьокуускайга МЧС эспэдииссийэтэ Мурманскайтан аҕалла.

Тохсунньу 22 күнүгэр «Куттала суох Арктика — 2025» РФ МЧС эспэдииссийэтин кыттыылаахтара Мурманскайтан Дьокуускайга Умуллубат уот лампадатын аҕаллылар. Быыһааччылар Норильскайтан кэллилэр.

Арктическай эспэдииссийэ 2024 сыл ахсынньы 25 күнүттэн Кольскай тумул арыытыттан саҕаламмыта. Бу тэрээһин Аҕа дойду уоттаах сэриитигэр Улуу Кыайыы 80 сылыгар ананар.

Быыһааччылар Арассыыйа Арктическай зонатынан 9 эрэгийиэнинэн, уопсайа 12 тыһ. км, айанныыллар. Умуллубат уот эрэгийиэнтэн эрэгийиэҥҥэ бэриллэр. Бу курдук Чукоткаҕа Певек куоракка тиэрдиллиэхтээх диэн иһитиннэрэллэр.

Хаартыскалар:  Дьокуускай аэропордун пресс-сулууспата