Сунтаарга ардах, инчэҕэй хаар түстэ

Бүгүн, кулун тутар 19 күнүгэр, өрөспүүбүлүкэ арҕаа өттүгэр, Өлүөнэ аллараа тардыытынан, киин, соҕуруу оройуоннарга кыралаан хаардыаҕа, соҕуруулуу-арҕаа инчэҕэй хаар, күнүс ардах түһүөҕэ диэн күнү-дьыл кэтээн көрөөччүлэр билгэлээбиттэрэ.

Эбиэт диэки халлаан лаппа сылыйан, Сунтаарга инчэҕэй хаар, ардах түстэ диэн олохтоохтор кэпсээтилэр.

1998 сыллаахха Дьокуускай куоракка +2 кыраадыска тиийэ сылыйа сылдьыбытын https://sakha-sire.ru/kulun-tutarga-ardyan-sep/ суруйан турабыт.

1945 сыл муус устарга Амма улууһун Лээги нэһилиэгин киинигэр ардаабытын туһунан бу курдук суруллар: “1945 сыл муус устар 7-8 күннэригэр Лээги нэһилиэгин киинигэр икки күнү быһа тохтуу-тохтуу итии самыыр дохсуннук түстэ. Итини кытта сэргэ муус устар 7 күнүгэр киэһээ 8-9 чаас саҕана хараҥа былыт тахсан баран чаҕылҕан чаҕылыйда уонна этиҥ эттэ.

Айылҕаҕа итинник түбэлтэлэр биһиги үйэбитигэр уонна ол анараа өттүгэр буолбута биллибэт этэ – диэн олохтоох кырдьаҕастар кэпсииллэр”, — диэн улуус хаһыатыгар суруллар.

Биэс сыллааҕыта, 2018 сыл кулун тутар 21 күнүгэр Өлүөхүмэ улууһун Кыыллаах нэһилиэгин Даппарай сэлиэнньэтигэр киэһэ 21-22 чааска ардаан турар, ол кэмҥэ +2 кыраадыс эбит. Ити туһунан олохтоохтор кэпсээбиттэрин биһиги саайтпытыгар суруйбуппут.