Уокка сиэппит оҕо балыыһаттан таҕыста

Ааспыт ыйга өрөспүүбүлүкэ олохтоохторун дьиикэй (итинтэн атыннык ааттыахха табыллыбат) быһылаан аймаабыта. Ыам ыйын 26 күнүгэр Нам улууһугар 8 саастаах оҕо 5 саастаах уол таҥаһын уматан, улаханнык эмсэҕэлэппитэ. Кырачаан уол балыыһаҕа 36 күн устата эмтэнэн, иккитэ эпэрээссийэлэнэн баран, бүгүн «Уокка сиэтиини эмтиир киинтэн» таҕыста. Бу туһунан Доруобуйа харыстабылын министиэристибэтэ иһитиннэрэр.

Оҕо күөх сайын үгэнигэр, 36 күн устата оронтон турбакка, саастыылаахтарын кытта оонньообокко, сыппыт. Ийэтэ суруйарынан, уолчаан таһырдьа тахсыан, оонньуон наһаа баҕарар үһү. Ону баара, ордук хос хамсанара барыта амырыын ыарыы нөҥүө ааһар. Ыарыытыттан түүннэри-күнүстэри да ытыыр эбит. «Түөрт нэдиэлэ аад курдук ааста. Быраастарга махтал!», — диэн ийэтэ реанимацияттан тахсан баран, суруйбута. Биллэрин курдук, эпэрээссийэ, наркоз да доруобуйаҕа охсуута суох ааспаттар.

Оҕо тириитин 25%-нын уокка сиэппит этэ. Сүрүннээн түөһүн, моонньун, сэҥийэтин, кулгааҕын, көхсүн, саннын, илиитин, атаҕын сиэппит.

«Пациеҥҥа тириини көһөрүүгэ икки эпэрээссийэ оҥоһуллубута. Бүгүн ийэтин кытта балыыһаттан таҕыстылар. Уол туруга ама соҕус («удовлетворительно»). Салгыы олорор сиринэн поликлиникаҕа көрдөрүнүөҕэ уонна былаан быһыытынан, «Уокка сиэтиини эмтиир кииҥҥэ» кэтээн көрүөхтэрэ», — диэн Доруобуйа харыстабылын министиэристибэтин суругар этиллэр.

Умаппыт уолу уонна кини төрөппүттэрин учуокка туруорбуттара. Төрөппүт эбээһинэһин ситэри толорбот буолууга РФ Административнай быраабы кэһиигэ Кодексын 5.35 ыстатыйатын 1 чааһынан административнай дьыала тэриллибитэ. Ол эрээри, билиҥҥитэ туох миэрэ ылыллыбыта биллибэт.