Уол оҕо доҕорун ийэтиттэн харчы уоран тутулунна

Таатта улууһун олохтооҕо баан счетуттан 60 тыһыынчаттан тахса солкуобай уоруллубутун туһунан полицияҕа сайабылыанньа түһэрбит.

Полиция үлэһиттэрэ ыыппыт суһал-көрдүүр тэрээһиннэрин түмүгэр, уорбаланааччынан сайабылыанньаһыт уолун 15 саастаах доҕоро буолара быһаарыллыбыт. Бу туһунан  ИДьМ-тын пресс-сулууспата иһитиннэрэр.

Кэлин быһаарыллыбытынан, уорбаланааччы доҕоругар хоноһуттуу кэлбит. Уолаттар көмпүүтэринэн оонньоон бириэмэлэрин атаарбыттар. Буруйу оҥорооччу, доҕоро ийэтин төлөпүөнүнэн туһана сырыттаҕына, эмсэҕэлээччи смартфонун паролун өйдөөн хаалбыт. Сарсыарда эрдэ, бары утуйа сыттахтарына, кини смартфону ылан, «мобильнай баан» өҥөтүнэн 60 тыһыынчаттан тахса солкуобайы уорбут. Уоруллубут харчытын барытын буруйу оҥорооччу оонньуу валютатын атыылаһарга ыыппыт, онтукатынан шутер жанрдаах биир онлайн-оонньууга саҥа персонаж ылбыт. Сокуоннай сааһын ситэ илик оҕоҕо «уоруу» ыстатыйанан холуобунай дьыала тэрилиннэ.