Уол оҕо, эр киһи харысхалын туомнара

Саха ыалын сиэрэ-туома.

Былыр саҥа төрөөбүт уол оҕону абааһыттан кистээн биһигэр бастаан ыт оҕотун угаллара. Онтон биирдэ сытыараллара.

Уол оҕоҕо уһуктааҕы, биилээҕи, сааны утары туппаттар, тоҕо диэтэххэ, куһаҕан тыын киирэн кинини  дэҥниэн сөп. Улаатан оноҕоһунан дуу, маһынан дуу оонньуур буоллаҕына, киһини кыҥыа суохтаах, «бэйэтин кыҥыыр» диэн өйдүүллэрэ. Ийэтэ эбэтэр аҕата оһох чанчыгар алгыы турдахтарына, иннилэригэр киирэн туруо суохтаах. Ыалдьыт кэллэҕинэ, кини иннинэн быһа хаамыа суохтаах, оһох эрэ кэннинэн сылдьыахтаах. Уол оҕо тэлгэһэтин ааныттан дьиэтигэр диэри кэннинэн хаамыа суохтаах, ол — аньыы, түктэри быһыы. Улахан дьон арыгы испит үрүүмкэлэриттэн тобох хаалбытын уол оҕо сыпсырыйыа суохтаах.

Афанасий Федоров «Саха ыалын сиэрэ-туома» кинигэтиттэн

«Айар» кинигэ кыһата, 2025 с.