«Уол оҕо — норуот кэскилэ» күрэс онус төгүлүн ыытыллар

Муус устар 27-28 күннэригэр Педагог уонна уһуйааччы сылыгар анаммыт “Уол оҕо – норуот кэскилэ” кэтэхтэн куонкурус онус төгүлүн ыытыллар. Күрэһи үөрэх, наука министиэристибэтэ уонна “Юные якутяне” өрөспүүбүлүкэтээҕи ресурснай киин тэрийэн ыыталлар.

Бу күрэс сыала-соруга – уол оҕолору иитиигэ сөптөөх усулуобуйаны тэрийии, талааннаах, дьоҕурдаах уолаттары булан, өйөөһүн буолар. Манна үөрэнээччилэр уонна уһуйаан иитиллээччилэрэ кытталлар.

Күрэс түһүмэхтэрэ кэтэхтэн ыытыллаллар, онон оҕолор үөрэхтэригэр мэһэйдэппэккэ, кэлэ-бара сатаабакка, төһө баҕарар кыттыахтарын, дьоҕурдарын көрдөрүөхтэрин сөп.

Күрэс хайысхалара: ырыа, үҥкүү, өй-билии тургутуга, уус-уран ааҕыы уонна прикладной, тэхиньиичэскэй айар үлэ быыстапката.

Эспиэрдэр хамыыһыйалара уолаттары саастарынан арааран, сыаналыаҕа: 7-11 саастаахтар, 12-14 саастаахтар, 15-18 саастаахтар диэн арахсаллар.

Сайаапкалары муус устар 25 күнүгэр диэри kreat-tvori@mail.ru электроннай буостаҕа туталлар.

Түмүктэр муус устар 28 күнүгэр «Юные Якутияне» саайтыгар: https://sakhaedu.ru/ тахсыахтара.