Уол оҕо суотабай төлөпүөнү уорууга уорбаланар

ИДьМ сулууспатын Дьокуускайдааҕы 2 №-дээх полиция отделын дьуһуурунай чааһыгар олохтоох 18 саастаах кыыстан дьиэтиттэн суотабай төлөпүөнэ уоруллубутун туһунан сайабылыанньа киирбит.

Полиция отделын холуобунай ирдэбил үлэһиттэрэ суһал-ирдиир тэрээһиннэринэн буруйдаах 16 саастаах уол оҕо буолара быһаарылынна.

Силиэстийэҕэ биллибитинэн, уорбаланааччы эмсэҕэлээччи дьиэтигэр ыалдьыттыы сылдьыбыт. Биир кэмҥэ кинилэр икки ардыларыгар тыл-тылга киирсибэт буолуу тахсыбыт, онон уол оҕо дьиэттэн төлөпүөнү тутан тахсыбыт.

Уорбаланааччы этэринэн, кини аан бастаан суотабайы түннүгүнэн таһырдьа бырахпыт, онтон аллараа түһэн ылбыт уонна кэлин ууга бырахпыт.

РФ Холуобунай Кодексатын 158-с ыстатыйатын 1-кы чааһынан (“Уоруу”) холуобунай дьыала тэрилиннэ. Уол оҕо икки сылга диэри көҥүлэ быһыллыан сөп, диэн  ИДьМ пресс-сулууспата иһитиннэрэр.