Сылгы баазатыгар күрэхтэстилэр

Амма улууһугар Болугурга сыл аайы «Уол оҕо охтума, аккыттан сууллума» бырайыак тэрээһинэ үрдүк таһымнаахтык ыытыллар. 

Быйылгы тэрээһин О.П.Иванова-Сидоркевич аатынан оҕо сайдар киинин «Дьөһөгөй. Сир эдэр хаһаайыттара» иитинэн олус үчүгэйдик, сэргэхтик буолан ааста. «Болугур» ТХПК сылгы баазатыгар мустан биэс түһүмэххэ күрэхтэстилэр. Манна Е.Е. Пахомов аатынан Болугур орто оскуолатын 6, 7, 8 кылааһын уолаттара күөн көрүстүлэр. Оҕолор сүүрдүлэр-көттүлэр, күрэхтэһэн илин-кэлин түһүстүлэр, сылгыһыт үлэтин-хамнаһын көрдүлэр-иһиттилэр, дьөһөгөй оҕотун кытта алтыстылар. Тэрийээччилэринэн Болугур нэһилиэгин дьаһалтата, М.А.Ноговицын аатынан култуура киинэ, Е.Е.Пахомов аатынан Болугур орто оскуолата, нэһилиэк аҕаларын түмсүүтэ уонна «Болугур» ТХПК сылгыһыттара буоллулар.

Күөн күрэскэ барыта биэс хамаанда кытынна. Бастакы түһүмэххэ сылгыга сыһыаннаах викторина, иккискэ бириэмэҕэ аты сыарҕаҕа көлүйүү, үһүскэ сыарҕалаах атынан айаннааһын, төрдүскэ сылгыга сыһыаннаах ырыа-хоһоон, бэһис түһүмэххэ хомуур хапсаҕай. Күүстээх, тыҥааһыннаах, сытыы киирсии түмүгэр, бастакы миэстэни «Тыа оҕото», иккиһи «Урааҥхайдар», үсүһү «Дьөһөгөй» хамаандалар ылан үөрдүлэр, бириистэри тутан астыннылар.

Күрэхтэһии кэнниттэн сылгыһыттар оҕолору, ыалдьыттары сылаас аһынан-үөлүнэн күндүлээтилэр. Оҕолор сыарҕалаах атынан хатааһылаатылар, сибиэһэй салгыҥҥа астына-дуоһуйа сынньаннылар. Күрэхтэһиини тэрийээччилэргэ, сыарҕалаах аттары уларсыбыт биир дойдулаахтарбытыгар Гаврил Васильевич Тимофеевка,  Никифор Никифорович Тимофеевка оҕолор, төрөппүттэр ааттарыттан махтанабыт. Маннык туһалаах тэрээһиннэр тиһиктээхтик ыытыллалларыгар баҕарабыт.

Сахаяна Кожурова

Екатерина Осипова хаартыскаларга түһэриитэ