Уолаттарбытыгар ас-үөл, харчы хомуйан ыыттыбыт

Кэбээйи улууһун Ньидьили нэһилиэгэр байыаннай дьайыыга  сылдьар Чагдабыт уолаттарыгар санааларыгар күүс эбэ, дойдуларын ахтылҕанын таһаара «Кыайыы туһугар» аахсыйа биллэрбиппит.

Аахсыйаҕа нэһилиэкпит дьоно оҕотуттан улахан киһитигэр тиийэ, тэрилтэлэрбит биир да туора турбакка көхтөөхтүк кытыннылар. Ол курдук ыччаттарбытыгар оскуолабыт хас биирдии кылааһа сурук  суруйан, саллаат күннээҕи туттар малыттан таҥаһыгар-сабыгар тиийэ хомуйан туттардылар.

Маны таһынан оскуолабыт учууталлара, үлэһиттэрэ уонна тэрилтэлэр үлэһиттэрэ бурдук аһы, ыһаарыламмыт собону аҕалан туттардылар. Ону кытта талааннаах дьоммут кэнсиэртээн киллэрбит үптэрин — 12 900 солкуобайы уонна нэһилиэк олохтоохторуттан, дойдуларыттан ыраах олорор биир дойдулаахтарбытыттан хомуллубут үп  ыччаттарбытыгар ыытыллыа.

Бу аахсыйаҕа кыттыбыт тэрилтэлэрбит салайааччыларыгар, нэһилиэкпит олохтоохторугар барҕа махтал!

Инникитин да бу курдук түмсүүлээх, биир сомоҕо буолуоҕуҥ!

Баһылыкпыт Айыл Александрович  хомуллубут малы  салгыы байыаннай дьайыыга сылдьар ыччаттарбытыгар тус бэйэлэригэр  тиксэриэҕэ.

Альбина Ноговицына, “Тускул” култуураны сайыннарар киин уус-уран салайааччыта.