Уолаттарым, кыайыы-хотуу көтөллөөх эргиллиҥ!

Билигин, Ийэ дойдубутугар тирээн кэлбит балаһыанньанан,  быраат­тарым, уолум, дойдуларын көмүскүү байыаннай дьайыыга кытта сылдьаллар.

Онон,  Москва куоракка, бастакы Бэрэсидьиэммит Михаил Николаев ырааҕы өтө көрүүтүнэн оҥорбут элбэх үтүө дьаһалларыттан биирдэстэрэ – Бэс Чагда санаторийга тии­йэн, сынньанан, эмтэнэн кэллибит. Онно тугу биллиҥ-көрдүҥ диэн кыратык кэпсээтэххэ,  бастатан туран, өрөспүүбүлүкэбит салалтата сатаан дьаһа­йан, тэрийэн, байыаннай дьайыыга сылдьар хорсун уолаттарбыт госпиталларга сытан эмтэнэн баран, манна кэлэн чөллөрүгэр түһэр сирдэрэ эбит. Буойун уолаттарбыт барахсаттар, ким эрэ көлөөскөнөн, ким эрэ баттыгынан сылдьаллар, балаа­таҕа  сытааччылар да бааллар. Уолаттардыын көрсөн, дьиҥнээх уокка, инники кирбиигэ сылдьыбыт буойуннар кэмчи кэпсээннэрин иһиттим. Эмиэ ол курдук, бэйэм уолум өтөр-өтөр сибээскэ таҕыстаҕына, “…передоктан кэллибит, этэҥҥэбит…” диэнинэн бүтээччи.

Бу олороллор, уоту-­ууну ортотунан ааһа сылдьар уолаттарбыт барахсаттар! Уолаттартан көҥүллээх, ааттарын-позывнойдарын суру­йабын… Мичил – Шустрый, Сергей – Тимир, Иосиф – Синтай, Андрей – Хабзай уонна Мичил – Бөрө, бу уол дойдутугар ытык иэһин төлөөн, сулуус­палаан бүтэн, кэргэнин, оҕотун кытта дойдулаата.

Үчүгэйэ диэн, уолаттарга кэргэннэрэ, ийэлэрэ кэлэн бииргэ буолан, психологи­ческай  да өттүнэн, эмтэнэл­лэригэр да көмөлөһөллөр эбит. Сунтаартан сылдьар улахан эчэйиилээх уолга ийэтэ, кэргэнэ иккиэн бааллар. Аны Хабаровскайга ыытар буоллулар быһыылаах, арааһа, барсарбыт буолуо диэхтииллэр…

Эдьигээнтэн сылдьар (сэрии сылларыгар күүс өттүнэн көһөрүүгэ ыытыллан баран, онно олохсуйбут ийэм балтын оҕолорун билэллэр эбит)  хас да бааһырыылаах снайпер уол Алик-Рыбак, арыычча буолан, бииргэ сылдьар бойо­буой доҕотторугар барда… Биир өлүүгэ сылдьар бойо­буой быраат­таһыы диэн, дьэ, итинник,  үрдүктүк тутуллар быһыы­лаах…

Саллааттар таптыыр, ытыктыыр ийэлэрэ кэмиттэн кэмигэр Бэс Чагдаҕа сылдьан көрсөн ааһар эбит. Мария Егоровна Емельянова байыаннай дьайыы инниттэн даҕаны үгүс-элбэх сырыыны оҥорон, уолаттарга көмөлөһөн кэллэҕэ…

Биир ураты долгутуу­лаах түгэнинэн, Арассыыйа Дьоруойа  Игорь Юргинныын көрсүһүү, хаартыскаҕа түһэн үйэтитии буолла… Алдантан төрүттээх Саха сирин уола олох холку, үтүөкэн киһи эбит!

Көрсүбүт уолаттарбытыгар барыларыгар анаан илдьибит  өйдөбүнньүк сувенирдарбытын туттардыбыт.

Былырыын ыам ыйыгар уолбар ыыппыт суругум  сыл кэриҥэ буолан баран тиийбит… Үөрдүм, сүтэн-оһон хаалбатаҕыттан. Байыаннай дьайыы иэнэ, уһуна-киэҥэ улахана бэрт буоллаҕа…

Григорий ТУРАНТАЕВ-Чолбон,

РФ Суруналыыстарын,

РФ Худуоһунньуктарын айар сойууһун чилиэнэ,

СӨ уус-уран оҥоһуктарга маастара.

Чурапчы улууһа