Уолбаҕа сыл бэлиэтин Боппосов быраата оҥордо

Таатта улууһугар Уолбаҕа Михаил Боппосов быйыл балбаахтан сыл бэлиэтин оҥорбото. 

Тоҕо диэтэххэ, кини 12 сыл устата Саҥа дьылы көрсө сыл бэлиэлэрин барытын оҥордум диэбитэ. Ол оннугар, быйыл Михаил Трофимович  быраата  Иван Трофимович Боппосов убайын дьыалатын салҕаан, Дракону  оҥорон бар дьонун үөртэ.  Кини икки нэдиэлэ устата дракону уонна кини кэннигэр бөх кутар анал баах оҥорбут.

Иван Трофимович санаатын үллэһиннэ:

— Саҥа сылы көрсө халлааммыт, дьэ тымныйда. Биһиэхэ, Уолбаҕа, билигин -56 кыраадыс тымныы. Ити мин дракон моһуоннаах бөх кутар баах оҥордум. Балбаахтан уруккуттан ону-маны оҥорооччубун, холобур, эбисийээнэ, бөтүүк.

«Саха сирэ» хаһыат, саайт үлэһиттэригэр уонна өрөспүүбүлүкэ олохтоохторугар кэлэн иһэр Саҥа дьылынан истиҥ эҕэрдэбин тиэрдэбин!