Хаартыска И.Сивцев-Бээди тиксэриитэ
Модун кыахтаах Сэбиэскэй судаарыстыба улуу нуучча норуотун салалтатынан биэс сыллаах алдьархай аргыстаах Аҕа дойду сэриитин Улуу Кыайыынан түмүктээбитэ, арҕааҥы дойдуларга сайдалларыгар көмөлөспүтэ, кыаҕы биэрбитэ. Ол курдук Одессаҕа аан дойду үрдүнэн да суох улахан суудунаны өрөмүөннүүр собуот үлэлиирэ, тас дойдулартан хара муоранан таһаҕаһы таһыы, эргиэн киэҥ далааһыннаахтык барбыт кэмэ. Итини барытын уу харахпынан көрбүтүм.
Мин үөрэнэр да, эрчиллэр да сирдэрбэр Саха сириттэн соҕотох этим. Биирдэ да киҥир-хаҥыр саҥаны, кынчарыйан көрүүнү оччолорго билбэтэҕим.
Оттон билигин, хомойуох иһин Арассыыйа баайыгар-дуолугар иҥсэрэр харахтарын хатыыр арҕааҥҥы дойдулар алдьархайы эрэ аҕалар ардай аһыылларын килбэҥнэтэр буолбуттара олус хомолтолоох уонна кыһыылаах. Иэдээннээх иирсээни күөртүүллэр. Бу алдьархайдаах иирсээни тохтотор, эйэлээх олоҕу аҕалар туһуттан быһаарыы ылылыннаҕа. Маныаха Саха сирин эдэркээн уолаттара эйэлээх олоҕу туруулаһа барарга бэлэмнэрин тута биллэрбиттэрэ. Биһиги уолбут Вася бастакы хомуурга хабыллыбатаҕа. Онон турунан туран барарга быһаарыыны кытаанахтык ылыммытын ийэлээх аҕата тута сэрэйбиппит. Дьэ, инньэ гынан 2023 сыл сайыныгар контрагынан сулууспалыы барар. Бааһыран баран кыайан тахсыбакка сэрии толоонугар хаалбыт табаарыстарын таһаартыы сылдьан, бэйэтэ ыарахан эчэйиини ылбыта. Онон билигин Москубаҕа госпиталга эмтэнэ сытар.
Билигин санаатахпына, мин кинини анаан бэлэмнээбит курдукпун. Сайсарыга 10 тахса сыл олорбуппут. Күһүн, саас күөлгэ киирэн сүүрэр этибит. Сайынын «Юность» стадиоҥҥа тиийэн эрчиллэрбит. Көрөөччүлэр олорор трибуналарын үөһээ өттүгэр диэри кирилиэһинэн сүүрэн тахсар этибит. Итинник сыал-сорук туруорунан дьарыктыырым. Өссө үлэбитигэр ыҥырыы кэллэҕинэ, баазаҕа контейнертан араас таһаҕаһы таһа барарбыт. Онон оҕолорум оскуолаттан ыла араас үлэҕэ эриллибиттэрэ. Ити барыта инники олохторугар туһалаах буолуохтааҕын өйдүүр этим. Оттон сүүрүү — спорт биир саамай туһалаах көрүҥэ. Киһи сүүрэ сылдьан толкуйдуур, ырытар дьоҕура улаатар. Тус бэйэм онно сүрүн болҕомтобун уурарым.
Вася байыаннай дьайыыга барарга санаммытын истэн баран, оннук буолуохтаах диэн санаабытым. Кини итинтэн атын быһаарыныыны ылара сатаммат этэ. Оҕо сырыттаҕына биири бэлиэтии көрбүппүн умнубаппын. Ол курдук, суол быһа охсуһуутугар хаайтаран турар элбэх тутуурдаах нуучча эмээхсинигэр тиийэн көмөлөспүтэ. Уопсайынан, кини итинник көмөлөспүт түгэнэ элбэх эбээт. Оннооҕор туох эмэ суһал ыҥырыыга да үлэлии баран иһэн, аара суолга кыһалҕалаахтарга, кыамматтарга, кырдьаҕастарга хайаан да көмөлөһөн ааһара. Мин тиэтэтэн көрдөхпүнэ, истибэккэ көмөлөһөн тэйэрэ. Кинит оннук аһыныгас буолан уонна эйэлээх олох туругурарын туһугар маннык толкуйданнаҕа. Дьылҕа хаан хайдах быһаарарынан, ону утарбыт суох. Сорохтор миигин уолгун тоҕо тохтоппокко ыыттыҥ диэн сэмэлээбиттэрэ.
Билигин Вася төрдүс эпэрээссийэтин ааста. Госпиталтан таҕыстаҕына байыаннай дьайыыга барар санаалаах. Биһиги, төрөппүттэрэ, туох да диир санаабыт суох.
Иван Сивцев-Бээди
Хаартыскалар: Иван Сивцев тиксэриилэрэ
Горнай улууһугар Атамайга улуустааҕы "Родные - Любимые» дьиэ кэргэн пуорума үрдүк таһымҥа буолан ааста. Пуорум…
Күн-дьыл туруга бу күннэргэ хайдаҕый? Өрөспүүбүлүкэ соҕуруулуу-арҕаа өттүгэр, Халыма-Индигиир оройуоннарыгар кыралаан хаардыыр. Киин улуустарга сорох…
Бу нэдиэлэҕэ Саха сириттэн байыаннай дьайыы буола турар сиригэр 20 туонна таһаҕаһы тиэммит массыыналар айаннаатылар.…
Бүгүн, ахсынньы 10 күнүгэр, Ил Дархан Айсен Николаев "ОКТО" хампаанньа дириэктэрдэрин сэбиэтин бэрэссэдээтэлигэр Алексей Толоконниковка…
«Сахаада-спорт» СӨ норуоттарын успуорт төрүт көрүҥнэригэр уонна оонньууларыгар ассоциацията быйылгы лауреаттары ааттаата. Лауреаттары успуорт көрүҥнэринэн…
Байыаннай дьайыы кыттыылааҕа Петр Парников Мэҥэ Хаҥалас улууһун Хара нэһилиэгин успуорт оскуолатыгар тириэньэринэн үлэҕэ киирдэ.…