Уон ойуур баһаара бохсулунна, биир баһаар умуруорулунна

Бу туһунан РФ ЫБММ управлениетын Саха сиринээҕи салаатын начаалынньыгын бастакы солбуйааччы Виталий Немцов бэрэссэдээтэллээх ыксаллаах быһыыны-майгыны сэрэтэр, туоратар итиэннэ баһаартан куттал суох буолуутун хааччыйар хамыыһыйа киэһээҥҥи мунньаҕар экология миниистирин солбуйааччы Андрей Коноплев иһитиннэрдэ.

—Бүгүн алта улууска уон ойуур баһаара бохсулунна, ону тэҥэ 1,5  га иэннээх сири хаппыт биир ойуур баһаара умуруорулунна, — диэтэ Андрей Коноплев.

Өрөспүүбүлүкэ сиригэр-уотугар бүгүн, атырдьах ыйын 13 күнүгэр, киэһээҥҥи иһитиннэриинэн 102 ойуур баһаара 16 улууска баара бэлиэтэнэр. Хонтуруолга 25 баһаар баар. Бу 32 нэһилиэнньэлээх пуунтан 15  км. тэйиччилэр.

Ойуур баһаарын умуруорууга 1 811 киһи, 190 тиэхиньикэ үлэлиир.

Уон салгын аала ботурууллааһыҥҥа, алта МИ-8  бөртөлүөт уоту умуруорууга сылдьаллар.

СӨ Ил Дарханын уонна Бырабыыталыстыбатын пресс-сулууспата