Байыастар уоппускаҕа кэллилэр

Бүгүн, кулун тутар 30 күнүгэр,  икки нэдиэлэлээх уоппускаҕа 18 байыаннай сулууспалаах кэллэ.

Дьокуускай куорат аэропуордугар кинилэри СӨ Бырабыыталыстыбатын бэрэссэдээтэлин солбуйааччы Георгий Степанов, байыастар чугас дьонноро көрүстүлэр.

Георгий Степанов Ил Дархан аатыттан байыастары дойдуларыгар кэлбиттэринэн эҕэрдэлээтэ, саха быһахтарын бэлэх быһыытынан туттарда.

«Улахан эппиэтинэһи сүгэ сылдьаргытын өйдүүбүт. Бары Аҕа дойдугут иннигэр эбээһинэскитин толороҕут. Биһиги эһиэхэ уонна эһиги дьиэ кэргэттэргитигэр барыта этэҥҥэ буоларын туһугар кыһаллабыт«, — диэтэ кини.

«Биһиги бары туспа десантнай-штурмовой биригээдэҕэ сулууспалыыбыт. Бойобуой сорудаҕы толоробут. Аармыйаҕа сулууспалаабытым, былырыын мобилизацияҕа ыҥырыллыбытым. Барыта этэҥҥэ буоларыгар эрэнэбин. Саха сириттэн барбыт байыастар — дойдуларыгар бэриниилээхтэр. Барыта этэҥҥэ буолуо«, — диэтэ байыастартан биирдэстэрэ.

СӨ Ил Дарханын уонна Бырабыыталыстыбатын пресс-сулууспата