Уоппусканы бириэмийэ кэнниттэн ылар табыгастаах

2026 сылга Арассыыйа олохтоохторун 27 бырааһынньык күнэ уонна хаһан да буолбатах 12 күннээх Саҥа дьыллааҕы сынньалаҥ кэтэһэллэр – 2025 сыл ахсынньы 31 күнүттэн 2026 сыл тохсунньу 11 күнүн ылан туран.

Омос көрдөххө, бу күннэри кытта уоппусканы холбуу ылар табыгастаах курдук, ол эрээри юристар маннык дьаһаныы оччо барыстаах буолбатах диэн сэрэтэллэр.

Барыта суоттааһынтан тутулуктаах. Уоппуска харчыта ааспыт 12 ый устата күннээҕи орто хамнаскар олоҕуран төлөнөр, оттон хамнас ыйга төһө үлэ күнэ баарыттан тутулуктаах. Тохсунньуга уонна ыам ыйыгар үлэ күнэ аҕыйах, ол аата хас биирдии үлэ күнэ «күндү». Бу ыйдарга уоппуска ыллаххына, суумата хамнаскынааҕар кыра буолар.

Элбэх үлэ күннэрдээх ыйдарга – муус устарга, от ыйыгар, атырдьах ыйыгар, балаҕан ыйыгар, алтынньыга сынньанар табыгастаах. Олорго үлэ күнэ элбэх, орто хамнас намыһах, оччотугар уоппуска төлөбүрэ үгэс буолбут хамнастан да үрдүк буолуон сөп.

Өскөтө бириэмийэ бэриллэр кэмигэр түбэстэххинэ, уоппускаҕын тута ол кэнниттэн ыл – уоппускаҥ харчыта элбэх буолуо.

Уоппусканы үлэ биэрээччини кытта сөбүлэһэн оҥороргутун умнумаҥ уонна 2025 сыл ахсынньы 17 күнүгэр диэри былааҥҥытыгар киллэриҥ, диэн этэр “Российская газета”.