Уопсастыбаннай балаатаҕа доруобуйа харыстабылын сүрүн боппуруостарын дьүүллэстилэр

Бүгүн, ахсынньы 8 күнүгэр, СӨ Уопсастыбаннай балаататыгар  «Доруобуйа харыстабылын эйгэтин үбүлээһин уонна социальнай мэктиэлэри хааччыйыы дьоһун суолталаах боппуруостара”  “төгүрүк остуол” буолла.

Тэрээһиҥҥэ СӨ Судаарыстыбаннай Мунньаҕын доруобуйа харыстабылыгар  сис кэмитиэтиттэн, СӨ Бырабыыталыстыбатыттан, СӨ Доруобуйаҕа харыстабылын, Үпкэ, Экэниэмикэҕэ министиэристибэлэриттэн, РФ Доруобуйаҕа харыстабылын үлэһиттэрин идэлээх Сойууһун  өрөспүүбүлүкэтээҕи тэрилтэтиттэн,  наркология диспансерыттан, психоневрология диспансерыттан, Доруобуйа харыстабылын министиэристибэтин уопсастыбаннай сэбиэтиттэн, муниципальнай тэриллиилэртэн уо.д.а.  кытыннылар. Кинилэртэн сорохторо онлайн-сибээһинэн таҕыстылар.

Кэпсэтиини  СӨ Уопсастыбаннай балаататын бэрэссэдэтээлэ Станислав Иванов, СӨ Доруобуйаҕа харыстабылын миниистирэ Лена Афанасьева, Уопсастыбаннай балаата доруобуйа харыстабылыгар, физическэй култуураҕа уонна успуорка кэмитиэтин бэрэссэдээтэлэ Ольга Татаринова  сүрүннээн ыыттылар.

Станислав Иванов эппитинэн, билигин сытыытык турар, аһаҕастык уонна дириҥник кэпсэтиллиэхтээх боппуруостары Уопсастыбаннай балаатаҕа  дьүүллэһэр үгэс олохсуйда.

“Доруобуйа харыстабыла олус уустук, элбэх ыйытыылар киирэр салаалара. Доруобуйа харыстабылын эйгэтигэр элбэх саҥа эбийиэк үлэҕэ киллэриллэр. Биһиги доруобуйа харыстабылын туһунан кэпсэтэрбитигэр каадыр тиэмэтин эмиэ көтөҕүөхтээхпит. Бу олус дьоһуннаах боппуруос”, — диэн кэпсэтиини саҕалаата.

Бүгүҥҥү “төгүрүк остуолга” үс сүрүн боппуруоһу: эминэн хааччыллыыга эбии үбүлээһин, санитарнай авиацияны үбүлээһин уонна бастакы сүһүөх звено үлэһиттэригэр социальнай төлөбүрү оҥоруу көрдүлэр. Бу ордук туруорсуулаах боппуруостарынан биллэллэр.

Лена Афанасьева Национальнай бырайыактар, доруобуйа харыстабылыгар саҥа технологиялар, каадырдары бэлэмнээһин туһунан этэригэр быйыл 99-тан  исписэлиис кэлбититтэн 18 быраас баарын, кинилэр бары Саха сиринээҕи мэдиссиинэ үөрэҕин кыһаларын бүтэрбиттэрин бэлиэтээтэ. Улуустарга 111 исписэлиис үлэлии тиийбититтэн 71 —  быраас, 40 —  биэлсэр. Национальнай бырагыраама тэрээһиннэрин олоххо киллэрэргэ быйыл  231 мөлүйүөн солкуобай бэриллибитэ.

Саха Өрөспүүбүлүкэтигэр бас билии араас көрүҥнээх  256 тэрилтэтэ  эминэн-томунан хааччыйар көҥүллээх. Итинтэн 33-һэ  – улуустааҕы киин балыыһалар, быраас амбулаториялара уонна биэлсэр-акушер пууннара. Cаха сиригэр 198 тыһыынча киһи (өрөспүүбүлүкэ олохтоохторун 19 бырыһыанаа) эминэн хааччыллыыга чэпчэтиинэн туһанар араҥаҕа киирсэр. Чэпчэтиинэн туһанар араҥаҕа 2026 сылга 3,8 миллиард солкуобай көрүлүннэ. 70 тыһыынча кэриҥэ киһи федеральнай чэпчэтиинэн туһанар. Хомойуох иһин, кинилэртэн 35 бырыһыана чэпчэтиини харчынан ылар (монетизация). Ити өрөспүүбүлүкэ бүддьүөтүгэр уустук.

Эминэн хааччыллыыга СӨ Доруобуйаҕа харыстабылыгар министиэристибэтэ мониторины тиһигин быспакка ыытар. Амбулаторнай эмтэниигэ эминэн хааччыллыы федеральнай үп суотугар, балыыһаҕа сытан эмтэниигэ Булгуччулаах мэдиссиинэ  страховка суотугар  оҥоһуллар.Хотугу сир нэһилиэнньэтигэр эми-тому атыылаһары кииннээһин салҕаныаҕа.

Онтон санитарнай авиацияҕа, федеральнай үбү учуоттааан, 2,6 миллиард солкуобай көрүллүөҕэ. Бу, 2025 сылы кытта тэҥнээтэххэ, 1,4 миллиардынан элбэх.

Ольга ТАТАРИНОВА:

-Эминэн эбии хааччыллыыны үбүлээһин кээмэйэ эһиилги сыла улаатыаҕа. Ол гынан баран, нэһилиэнньэ наадыйыытын, хомойуох иһин, биһиги толуйбаппытын өйдүүбүт. Тоҕо диэтэххэ, нэһилиэнньэ уонна мэдиссиинэ тэрилтэлэрэ элбииллэр, саҥаттан саҥа ыарыһахтары булаллар. Кинилэри үбүлээһиҥҥэ киллэриэхпитин наада. Биллэн турар, төлөбүрдэр оҥоһуллуохтара. Биһиги хас биирдии кыһалҕаны кытары үлэлиэхпит.