Уопсастыбаннай сынньалаҥ сирдэрэ төрүт култуураны кытта сибээстээхтэр

Кэлиҥҥи сылларга киин куоракка уонна улуустарга уопсастыбаннай сирдэр тупсаҕай оҥоһуулаах буолбуттарын Ил Дархан бүгүҥҥү Ил Түмэҥҥэ туһаайбыт этиитигэр бэлиэтээтэ.  

Маныаха  өрөсбүүлүкэ  Аҕа баһылыгын иһинэн үлэлиир архитектура уонна куораттыы тутуу управление салайааччыта Любовь Папок бэйэтин санаатын маннык үллэһиннэ:

— Өрөспүүбүлүкэ баһылыга араас омук майгыннаһар өрүттэрин,  сиэр-майгы сыаннастарын, сайдыыга биир сомоҕо буолууну бөҕөргөтүүгэ дьулуһуохтаахпытын бэлиэтээн туран, куораттарга уонна улуустарга уопсастыбаннай сирдэри тупсарыыга улахан хамсааһын тахсыбытын бэлиэтээтэ. Ол курдук, быйыл 46 бөдөҥ холобурга сылдьар тупсаҕай уопсастыбаннай сынньанар сирдэр баар буолбуттарын эттэ. Холобур, Хаандыгаҕа уонна Бэрдигэстээххэ, ону тэҥэ Мэҥэ Хаҥалас улууһугар Сыымахха 2025 сылга генеральнай былаан оҥоһулунна. Уопсайа өрөспүүбүлүкэҕэ 24 нэһилиэнньэлээх пуун генеральнай былаанын оҥоһуута түмүктэннэ. Нэһилиэнньэлээх пууннары сайыннарыыга туһуламмыт өрөспүүбүлүкэҕэ 43 нэһилиэнньэлээх пууну хабар «Олох инфраструктурата» национальнай бырайыак быйыл 2025 сылга саҕаланна.

Бырабыыталыстыба Булуҥ оройуонугар Тиксии-Найба генеральнай былаанын бигэргэттэ. 2026 сылга Томмот уонна Хандыга, Аллараа Бэстээххэ, Өлүөхүмэҕэ уонна Аммаҕа  пааркалар уонна искибиэрдэр тутуллуохтара. 

РФ Бэрэсидьиэнэ Владимир  Путин 2026 сылы Арассыыйа норуоттарын сомоҕолоһууларын сылынан биллэрбитэ. 2026 сыл Саха сиригэр Култуура сылынан биллэрилиннэ.  Онон  Култуура сылыгар Арассыыйа бэрэсидьиэнин быһаччы дьаһалынан тутулла турар Муусука үрдүкү оскуолатын уонна эпос уонна ускуустуба Арктическай киинэ курдук саҥа тутуулар олоххо киириэхтэрэ. Улуустарга тутулла турар уонна тутуулара былааннанар уопсастыбаннай сынньалаҥ сирдэр, биллэн турар, олохтоох төрүт култуураны кытта ыкса сибээстээхтэр.