Уопсастыбаннай түмсүүлэр байыастарга көмөнү ырыттылар

Саха сиринээҕи Аҕа дойду буойуннарын дьиэ кэргэттэрин кэмитиэтин салайааччы Марина Бахилина Ростов-на-Дону куоракка буолбут  «СВОи приходят на помощь» кэмпириэнсийэҕэ кытынна. Пуорумҥа  байыаннай дьайыы кыттыылаахтарын уонна кинилэр дьиэ кэргэттэрин өйүүргэ кыттыгастаах уопсастыбаннай тэрилтэлэр уонна бырабыыталыстыба уорганнарын бэрэстэбиитэллэрэ түмсүбүттэрэ.

Кэмпириэнсийэ Кавказ иһин кыргыһыыга фашистскай Германияны сэбиэскэй сэриилэр кыайбыт күннэригэр сөп түбэһиннэрэн ыытылынна уонна байыаннай чаастары кытта алтыһыыга уопут атастаһар, саҥа ньымалары көрдүүр былаһаакка буолбута.

Кэмпириэнсийэ бастакы күнэ байыаннай полигоҥҥа буолла, онно кыттааччылар байыаннайдар сулууспалыыр уонна бэлэмнэнэр усулуобуйаларын билистилэр. Иккис күҥҥэ Соҕурууҥҥу байыаннай уокурук салалтатынан «Самбекские высоты» түмэл комплексыгар тэрээһиннэр буоллулар. Кэпсэтиигэ Аҕа дойду буойуннарын дьиэ кэргэттэрин кэмитиэтин салайааччы Юлия Белехова уонна Арассыыйа Оборуона министиэристибэтин, Ростовскай уобалас бырабыыталыстыбатын бэрэстэбиитэллэрэ кытыннылар.

«Бүгүн биһиги буойуннарбытыгар уонна кинилэр дьиэ кэргэттэригэр көмө систиэмэлээх уонна кэмигэр буолара ордук суолталаах. Дьэ, ол иһин биһиги бу маннык көрсүһүүлэргэ мустабыт — бастыҥ үөрүйэхтэри үллэстэргэ, эрэгийиэннэр икки ардыларыгар бииргэ үлэлээһини бөҕөргөтөргө, Аҕа дойдуну көмүскээччилэри өйүүр биир кэлим хайысханы оҥорорго«, — диэн бэлиэтээтэ Марина Бахилина.

Аан бастаан дойду 19 эрэгийиэниттэн бэрэстэбиитэллэр биригээдэлэргэ  көмөнү, өйөбүлү, хааччыйыыны тэрийэр биир кэлим систиэмэни уонна кэнсиэпсийэни оҥорорго муһуннулар. Бу холбоһуктаах үлэ сүрүн сыалынан анал байыаннай дьайыы кыттыылаахтарын өйүүргэ уопсастыбаннай тэрилтэлэр, волонтердар кииннэрэ, судаарыстыбаннай уорганнар күүстэрин түмэн, тыыл уонна фронт икки ардыларыгар алтыһыыга саамай көдьүүстээх механизмы оҥоруу буолла.