“Уопсастыбаннай үлэ муниципалитекка сыһыарыллар, оттон онно үп-харчы көстөрө кытаанах”

Дьокутааттар олоххо көхтөөх позициялаах, кими баҕарар кытта уопсай тылы булар, сэргэх дьоннор. Онон олорор нэһилиэктэрин, куораттарын сайдыытыгар биир сүрүн төһүү күүһүнэн буолалларын сэргэ туох итэҕэс-быһаҕас баарын туоратыыга эмиэ көхтөөх үлэни ыыталлар.

“Муниципалитеты 2.0: ИИ как драйвер развития территорий” муниципальнай хамаандалар пуорумнарыгар Ньурба куоратын дьокутаата, “Амакинка” түөлбэ салайааччыта Сербина Лариса Викторовнаны көрсөн кэпсэттибит.
—Лиэксийэни олус сэргээн, истэн олорбун. Элбэҕи бэлиэтэнним. Бэйэбин уопсастыбанньык киһинэн ааҕынабын, үлэлээбэппин, биэнсийэлээхпин. Уопсастыбаннай үлэ муниципалитекка сыһыарыллар, оттон онно үп-харчы көстөрө кытаанах.
Биһиги куораппытыгар Кыһыл знамялаах Амакинскай эспэдииссийэ геологтарын искибиэрдэрэ баар. Саха сирин алмааһын бастакынан кинилэр арыйбыттара. Уопсайынан, геологтар биһиги өрөспүүбүлүкэбитигэр оҥорбут үтүөлэрэ элбэх, Амакинскай эспэдииссийэ кинилэргэ барыларыгар ийэлэрин курдук буоллаҕа. Ол искибиэр, хомойуох иһин, быраҕыллан турар. Сэттэ сылы быһа биһиги онно сарбынньаҕы олордон, көҕөрдө сатыыбыт. Биһиги куораппыт мээнэҕэ Күөх Ньурба дэммэт, онон Ньурба дьоно-сэргэтэ туруннаҕына кыайыахпыт, тупсарыахпыт диэн эрэнэбит.