Уоран кэллиэксийэлээбит да диэн…

Полиция Дьокуускай куорат тылы сайыннарар оскуолатыттан сыаналаах кинигэни уорууга уорбаланар киһини быһаарбыт.

ИДьМ Дьокуускайдааҕы 4-с нүөмэрдээх полиция салаатын дьуһуурунай чааһыгар тылы сайыннарар оскуолаҕа уоруу тахсыбытын туһунан иһитиннэрии киирбит. Билбэт киһилэрэ 7 тыһ. солк. суумалаах кинигэни уорбут.

Суһал-көрдүүр үлэ түмүгэр, уорууга 43 саастаах олохтоох киһи сыһыаннааҕа биллибит.

Уорбаланааччы бэйэтин дьыалаларынан сылдьан, тылы сайыннарар оскуола таас аанын кэннигэр кинигэлэрдээх долбууру бэлиэтии көрбүт. Буруйу оҥорооччу аҕыйах чааһынан төннөн кэлбит уонна кинини ким даҕаны көрбөтүн билэн баран, биһирии көрбүт энциклопедиятын уоран тахсыбыт. Уорбаланааччы этэринэн, кини кинигэни мунньар эбит, “кэллиэксийэбин хаҥатыахпын баҕарбытым” диэн быһаарбыт.

РФ Холуобунай кодексын 158 ыст. 2 ч. (“Уоруу”) холуобунай дьыала тэриллибит, тустаах ыстатыйанан 5 сылга диэри көҥүлэ быһыллыан сөп диэн ИДьМ Дьокуускай куораттааҕы управлениетын пресс-сулууспата телеграм-ханаалыгар суруйар. Уоран кэллиэксийэлээбит да диэн…