Уорганы ылааччыларга анал кэбиниэт аһыллыаҕа

Саха сиригэр быары көһөрүүгэ бэлэмнэнэр эбэтэр хайыы үйэ көһөртөрбүт ыарыһахтары кэтээн көрөр-истэр анал кэбиниэт аһыллыаҕа. Маннык сулууспа наадатын туһунан Саха Өрөспүүбүлүкэтин Доруобуйа харыстабылын министиэристибэтигэр «Доруобай быар» уонна «Инникигэ эрэл» эмтэнээччилэр уопсастыбаларын бэрэстэбиитэллэрин кытары дьүүллэстилэр.

— Бу биһиги өрөспүүбүлүкэбитигэр олус суолталаах боппуруос. Бүөр уорганын ылааччыларга (реципиеннар) маннык анал кэбиниэт Мэдиссиинэ национальнай киинигэр аһыллан, биир кэлим түннүк ньыматынан үлэлиир. Манна бүөрү ыларга бэлэмнэнээччилэри кытары дьарыктаналлар, ону таһынан хайыы үйэ эпэрээссийэлэммит ыарыһахтарга иммуносупрессияны хонтуруоллууллар. Онон, быары көһөртөрөөччүлэргэ эмиэ аһыллыахтаах дии саныыбыт, — диэн Катерина Григорьева кэпсээтэ.
Быардарын көһөртөрбүт дьон маннык кииннэммит кэбиниэт аһылларын туруорсубуттара ыраатта. Тоҕо диэтэххэ, ыарахан эпэрээссийэ кэнниттэн ыарыһах олох олорор туһугар салҕыы охсуһар. Кинилэр куруук быраас кэтээн көрүүтүгэр сылдьыахтаахтар, иммунитеттарын уонна иммуносупрессия таһымын хонтуруоллатыахтаахтар. Өрөспүүбүлүкэтээҕи килиниичэскэй балыыһа базатыгар үлэлиир анал кэбиниэт өрөспүүбүлүкэ бары эмтэнээччилэрин көрөр кыаҕа суох. Кинилэр ахсааннара сылтан сыл аайы элбиир. Онон, өр кэмҥэ быһаарыллыбатах боппуруос дьэ, быһаарылынна.
«Биһиги кыһалҕаны доруобуйа харыстабылын миниистирэ Лена Афанасьеваны кытары дьүүллэспиппит. Ол түмүгэр өйдөһүүгэ кэлэн, чопчу быһаарыы ылыммыппыт. Онон Мэдиссиинэ национальнай киинигэр быары көһөртөрөн ылааччыларга аналлаах кэбиниэккэ быраастар эпэрээссийэни күүтэр эмтэнээччилэри эмиэ көрүөхтэрэ, – диэн донорствоҕа анал бырайыактары олоххо киллэрэр «Уһуннук олоруохха» автономнай кэмиэрчэскэйэ суох тэрилтэ дириэктэрэ Наталья Каратаева быһаарда.
Быары көһөртөрүү эпэрээссийэтин ааспыт дьоҥҥо бу кэбиниэт аһыллыыта эмиэ олус туһалаах.
«Кэнники кэмнэргэ бу – сытыы боппуруостартан биирдэстэрэ этэ. Онон, биһиги миниистир Лена Николаевна Афанасьева кэлэн, дьэ быһаарыы ылыллыбытыттан үөрэбит. Сотору кэминэн сулууспа эмтэнээччилэри көрсүөҕэр эрэнэбит», – дэһэллэр.