Уоруллубут харчынан Дьокуускайга күүлэйдээбиттэр

Дьааҥы полициятыгар Баатаҕай бөһүөлэгин олохтооҕо 350 тыһ.солк. уордарбытын туһунан иһитиннэрбит. Оперативниктар маныаха 25 уонна 36 саастаах олохтоохтор уорбаланалларын быһаарбыттар. 

Быһаарыллыбытынан, эмсэҕэлээччи итирэн баран оптуобус тохтобулугар утуйан хаалбыт. Ол кэмҥэ уорбаланааччылар эр киһи аттыгар пакет сытарын уоран ылбыттар.

Пакет иһиттэн төлөпүөнү, бородууктаны уонна докумуоннары булбуттар. Эр дьон онлайн-бааны туһанан, бэйэлэрин счеттарыгар 350 тыһ.солк. ыыппыттар. Салгыы докумуоннары уонна төлөпүөнү оһоххо быраҕан  умаппыттар. Уорбут харчыларынан Дьокуускайга барар уонна төннөр билиэттэри атыыласпыттар, кэлэн сынньаммыттар, күүлэйдээбиттэр.

Уоруунан холуобунай дьыала тэрилиннэ.