“Уот Дьулустаан” испэктээк туруоруллуутун ахтан-санаан аастылар

Ньурба тыйаатырыгар суруйааччы Валентина Гаврильева «Уот Дьулустаан» айымньытынан испэктээк уонна сэрийээл тула кэпсэтии буолан ааста.

Испэктээккэ Ырыачай оруолун толорбут  СӨ үтүөлээх артыыската Александра Кривогорницына, Сүөкүлэни оонньообут  СӨ норуодунай артыыската Валентина Николаева, Балыксыт уобараһын арыйбыт СӨ норуодунай артыыһа Борис Борисов  уонна эдэр артыыстар Петр Филиппов, Ефрем Татаринов 1991 сыллаахха Юрий Макаров туруорбут «Уот Дьулустаан» испэктээгиттэн  быһа тардыыны көрдөрөннөр, мустубут дьону суруйааччы Валентина Гаврильева айымньытын эйгэтигэр киллэрдилэр, ураты туруорууну  санаттылар.

Ньурба тыйаатырын уус-уран салайааччыта, Саха Өрөспүүбүлүкэтин ускуустубатын үтүөлээх диэйэтэлэ Юрий Макаров суруйааччы Валентина Гаврильева  икки айымньытын  туруорбута.  1991 сыллаахха  аан бастакы туруорбут испэктээгинэн «Уот Дьулустаан» буолар. Онно Аҥар Хараҕы СӨ үтүөлээх артыыһа Дмитрий Иванов, СӨ норуодунай артыыһа Петр Андреев, Олоҥхоһуту Арассыыйа, Саха АССР үтүөлээх артыыһа Петр Николаев, Ылдьаананы Валентина Новгородова, Балыксыт кэргэнин СӨ култууратын туйгуна Валентина Мартынова толорбуттара. Бу испэктээгинэн Ньурба тыйаатыра 1992 с. Абакан куоракка ыытыллыбыт Сибиир национальнай тыйаатырдарын иккис  бэстибээлигэр  лауреат аатын ылбыта.  Александра Кривогорницына “Бастыҥ дьахтар оруола” сүрүн бирииһин ылбыта, испэктээк режиссера Юрий Макаров бэстибээл чаҕылхай арыйыытынан ааттаммыта. Ньукуу оруолун толорбут  Александр Титигиров «Көрөөччү биһирэбилэ» бирииһинэн наҕараадаламмыта.

1992 с.  Чебоксары куоракка буолбут «Федерация-92» бэстибээлгэ  Ньурба тыйаатыра  эмиэ лауреат аатын ылан ситиһиилэммитэ,  онтон  1993 с. «Уот Дьулустаан» испэктээк Москваҕа  «Театр Наций» сыанатыгар оонньоммута.

Дьикти, таайтарыылаах суруйааччы Валентина Гаврильева өссө биир айымньытын «Акаары дьахтары» Юрий Макаров  2002 сыллаахха туруорбута. Сүрүн оруолу СӨ үтүөлээх артыыската Венера Никитина толорбута.

Олунньу 24 күнүгэр испэктээк туһунан кэпсэтиигэ Юрий Макаров, Валентина Николаева, Борис Борисов, Александра Кривогорницына, СӨ култууратын туйгуна, режиссер көмөлөһөөччүтэ Валентина Гаврильева кыттыбыттара. Ньукуу оруолун толорбут СӨ ускуустубатын үтүөлээх диэйэтэлэ Александр Титигиров ыыппыт видеотыгар эдэр сааһын биир үтүө өйдөбүлэ буолбут испэктээгин ахтан кэпсээтэ.  Испэктээги сөргүтэн туруорууга Ньукуу оруолун солбуйбут   СӨ култууратын туйгуна Розалия Тартакынова санаатын тиэрдибитэ.

Кэпсэтии сыыйа тохсунньу 27 күнүттэн «Саха» НКИХ ханаалыгар көстүбүт   «Уот Дьулустаан» сэрийээлгэ  көстө. Кэпсэтиини тэрийээччилэр, тыйаатыры сэҥээрээччилэр, сэрийээли сөбүлээн көрө сылдьар ыалдьыттар  сценарист Катерина Григорьева-Кэрэмэс Сыдьаай, режиссер Елена Эверстова,  Аҥар Харах оруолун оонньообут СӨ култууратын туйгуна Алгыс Макаров-Сиэн Мөрөс уонна сэрийээлгэ  уһуллубут Данил Осипов, Федор Павлов Ньурба көрөөччүлэригэр  анаан ыыппыт видеоларын олус сэргээн көрдүлэр.

Сэрийээлгэ  оонньообут Ньурба тыйаатырын артыыстара, СӨ үтүөлээх артыыската Майя Слепцова, СӨ култууратын туйгуна Сардаана Михайлова, Анисия Колесова, Никита Григорьев киинэҕэ уһуллууларын туһунан, үлэ кэмигэр буолбут түгэннэриттэн кэпсээтилэр.

Тэрээһиҥҥэ сылдьыбыт дьон Валентина Николаева, Анисья Колесова тыйаатыр түмэлин архыыбыттан көрдөрүүгэ туруорбут  хаартыскаларын, сэрийээли оҥорбут, кыттыбыт дьон видеонан эҕэрдэлэрин көрөн, испэктээккэ, сэрийээлгэ кыттыбыт артыыстары кытта кэпсэтэн, хаартыскаҕа түсүһэн көрсүһүүттэн астынан тарҕастылар.

Ньурба тыйаатырын кэлэктиибин аатыттан кэпсэтии тэрийиитигэр көмөлөспүт Алгыс Макаровка, тэрээһиҥҥэ кыттыспыт  Александр Титигировка, сценарист Катерина Григорьеваҕа, режиссер Елена Эверстоваҕа,  Розалия Тартакыноваҕа,  Данил Осиповка, Федор Павловка, видеолары устан ыыппыт дьоҥҥо махталбытын тиэрдэбит.

Ньурба тыйаатырын пресс-сулууспата