Уот кыһыл ат сылын хайдах көрсөбүт?

Сылбыт элэҥнээн ааһа охсон, номнуо бүтэһик ый – ахсынньы үүннэ. Саҥа сылга диэри ыйы кыайбат кэм хаалла. Илиҥҥи халандаарынан үүнэр 2026 сыл Уот кыһыл ат сылынан биллэр. Хаһаайкалар харыйабытын хаһан туруорабыт, дьиэбитин хаһан киэргэтэбит, тугу кэтэбит, тугу астыыбыт диэн толкуйга сылдьаллар.

Хайдах саҕалыыгын — оннук ааһар

Сылы хайдах көрсөҕүн да, устар 365 күнүҥ ол курдук ааһар диэн элбэх киһи бэлиэтиир. Дьэ ол иһин үүнэр сыл бэлиэтин — хаһаайынын хомоппот, маанылаан көрсөр, сылы этэҥҥэ атаарар туһугар аныгы хаһаайкалар араас үгэстэри, бэлиэлэри тутуһарга дьулуһаллар. Кэлэр сыл бэлиэтэ — Уот кыһыл ат күүстээҕинэн-уохтааҕынан, үрдүккэ дьулуһарынан, тутулуга суоҕунан биллэр. Онон сыл иһигэр элбэх, түргэн уларыйыылар буолуохтарын, быһаарыылар ылыныллыахтарын, хамсааһыннар тахсыахтарын сөп диэн астрологтар биэлиэтииллэр. 2026 сылы көрсөргө туохха болҕомто уурабыт?

Харыйаны хаһан туруорабыт?

Урут дьон харыйаны иллэҥ соҕус күҥҥэ тыаттан кэрдэн киллэрэн ириэрэ түһээт, сарсыныгар туруораллара. Кэлин хаһаайкалар хаһан туруорар, хайдах киэргэтэр туһунан элбэхтик кэпсэтэллэр.

Саҥа дьыллааҕы настарыанньа эрдэттэн кэлэрин туһугар, оҥоһуу харыйаны ахсынньы саҥатыттан туруоран саҕалыахха сөп. Иннэтэ түспэт буолан манна хааччах суох. Харыйаны туруорарга саамай сүрүнэ күнэ-дьыла буолбакка, дьиэ иһинээҕи дьон бары кытталлара суолталаах.

Тэрилтэҕэ бырааһынньыктааҕы тыыны аҕалар, үлэ таһаарыытын тэтимирдэр, күүһүрдэр туһугар ахсынньы саҥатыгар туруорар табыгастаах диэн этэллэр.

Оттон тыыннаах харыйа сылааска турарыгар болдьохтоох. Олус эрдэ туруордахха, ордук ыттаах, куоскалаах буоллахха, бырааһынньык күн сорох тараҕай лабаалар эрэ ордон хаалыахтарын сөп. Онон тыыннаах харыйаны бырааһынньык буолуо уонча күн иннинэ туруоруҥ диэн исписэлиистэр сүбэлииллэр, саамай табыгастаах күннэр — ахсынньы 20–25 күннэрэ.

Норуот үгэһинэн ахсынньы 19 күнүгэр — Кыһыҥҥы Ньукуолун күн туруоруохха сөп диэн этэллэр. Бу күн туруордахха, сыл устата баай-талым олох, үөрүү-көтүү үксүүр диэн бэлиэтииллэр. Ону тэҥэ, ахсынньы 21 күнүгэр — саамай кылгас күн, күн кыһыҥҥы туруутугар сөп түбэһэннэрэн туруорар ордук.

Сылы хайдах көрсөҕүн да, устар 365 күнүҥ ол курдук ааһар диэн элбэх киһи бэлиэтиир.

Төһө даҕаны күнэ кылгаһын, түүнэ уһунун иһин, айылҕа саҥа кэрдиис кэмэ саҕаланар диэн ыйаллар. Онон бу күн туруоруллубут харыйа ураты күүстээх, олоҕу-дьаһаҕы үтүө өттүгэр уларытарга көмөлөһөр диэн этэллэр. Биллэн турар, урукку үгэс барыта тутуһуллубат. Саамай сүрүнэ харыйаны үчүгэй настарыанньалаах туруорар улахан оруоллааҕын умнумаҥ.

Хайдах киэргэтэбит?

Аны дьиэбитин, харыйабытын хайдах киэргэтэбит диэн эмиэ биир улахан толкуй турар. Аныгы хаһаайкалар араастаан истииллээн симииллэр. Анаан-минээн дьарыктанар дьон, Уот кыһыл ат сылын бэлиэтинэн, айылҕа өҥүн тутуһар табыгастаах диэн сүбэлииллэр. Дизайнердар олус чаҕылхай өҥтөн туттунуҥ диэн ити этиини эмиэ ыпсаран биэрэллэр. Онон 2026 сылга дьиэни-уоту, харыйаны киэргэтэргэ маҥаны, хоҥору (коричневай) кытта дьүөрэлээн кыһыл көмүстүҥү өҥү туттуохха, ону чээлэй күөҕүнэн тупсаран биэриэххэ сөп диэн этэллэр. Маныаха харыйаҕа кыһыл саардары, сыл бэлиэтин — ат оҥоһуктары ыйыахха, ууруохха сөп.

Уоту-күөһү урукку курдук таптаабытынан араастаан дьиримнэппэккэ, чаҕылыппакка, биир өҥү туттар ордугун сүбэлииллэр. Дьолго, аныгы кэмҥэ гирлянда “теплай”, “холоднай” диэн араас дьүһүннэрэ бааллар.

Тугу бэлэхтиибит?

Ат — күүс-уох бэлиэтэ. Онон үүнэр 2026 сылы элбэх буолан, хампаанньанан ылар үтүө түмүктээх буолуоҕа диэн астрологтар бэлиэтииллэр. Төһөнөн элбэх киһи, соччонон үчүгэй. Биллэн турар, кыра да буоллар барыларыгар өйдөбүнньүк бэлэх туттарар эбэтэр дьиэ кэргэн буоллахтарына ыалга анаан бэлэх-туһах оҥорор табыгастаах.

Психологтар, чуолаан Саҥа дьыл курдук сылга биирдэ тосхойор, кэлэр сылы түстүүр, дьиэ кэргэн барыта түмсэр бырааһынньыгар бэлэҕи ыксаатым-тиэтэйдим, буоллун-хааллын диэн ылымаҥ дииллэр. Бэлэҕим чопчу бу киһиэхэ туһалыа, быыллыйа сытыа суоҕа диэн анаан-минээн ылар ордук. Биллэн турар, үтүөнү баҕарар киһи сирбитин, куһаҕанын хаһан даҕаны бэлэх биэрбэт. Саҥа дьылга бу курдук бэлэҕи оҥорботох ордук: наскыны, хаалтыһы, улахан киһиэхэ сымнаҕас оонньууру, уһуктаах малы-салы, чаһыны, сиэркилэни, уустук көрүүлээх-харайыылаах сибэккини, туһата суох киэргэли, бэлэхтиир киһигитигэр баар бытовой тиэхиньикэни, иһити, аһы-үөлү…

Тугу кэтэбит?

Хас биирдии саҥа сылтан эрэли, сонун сүүрээни кэтэһэбит. Уот кыһыл ат сылыгар сылаас, күүстээх, ис кыах уотун уматар дьүһүннэр туттуллуохтаахтар. Маныаха саамай сүрүнэ өҥнөрү бутуйумуу буолар. Киһиэхэ бэйэтигэр барсар, санаата сытар, айылҕа өҥнөрүн сөпкө дьүөрэлээн кэтиллиэхтээх. Астрологтар таҥастан-саптан саҥа сылга сатабыл, ситиһии эмиэ тутулуктаах диэн ыйаллар.

Онон бырааһыннык бу тирээн кэлбитин кэннэ түрүлүөн түһэрбэт туһугар эрдэттэр хааччынныннар, “Кыһын Саха сириттэн саҕаланар” бэстибээли кытта бэлэмнэммитинэн бардыннар диэн сылааһынан суруйбут сүбэбитин сыа-сым курдук тутан туһаныаххыт, сүбэ-соргу оҥостуоххут диэн эрэнэбит.

БЭЧЭЭККЭ БЭЛЭМНЭЭТЭ ЛЮДМИЛА ПОПОВА.
ХААРТЫСКАЛАР HTTPS://PXHERE.COM/ СААЙТАН