Уот ситимэ умайда дуо?

Бүгүн сарсыарда бассаабынан Мэҥэ Хаҥаласка үрдүк күүрүүлээх уот лииньийэтэ   умайбытын туһунан  видео тарҕанна. Тугун-ханныгын билээри «Якутскэнерго» ПАУо Киин электрическэй ситимнэрин кытары сибээстэһэ сырыттыбыт.

Онуоха тохсунньу 18  күнэ үүнэр түүнүгэр  00:16 чааска  Аллараа Бэстээх — Хаптаҕай хайысхатынан  ВЛ-35 кВ Л-33 уот ситимигэр  технологическай алдьаныы тахсан, уот арахса сылдьыбытын туһунан иһитиннэрдилэр.

Саахал тахсыбатын туһугар уот ситимин араарбыттар. Майатааҕы РЭС үлэһиттэрэ суһаллык үлэлээн, түүн 02:30 чааска солбук исхиэмэнэн уоту холбообуттар.
Суһал үлэҕэ  10 киһи уонна  2 тиэхиньикэ үлэлээтэ диэн Киин электрическэй ситимнэр пресс-сулууспата иһитиннэрдэ.