Уот ситимэ үлэтин хааччыйыы боппуруостара көрүлүннүлэр

Ил Дархан Айсен Николаев Арассыыйа Антимонопольнай сулууспа салайааччытын Максим Шаскольскайы кытта көрсөн кэккэ үлэ боппуруостарын туһунан кэпсэтии ыытта.

Мунньах сүрүн тиэмэтинэн өрөспүүбүлүкэ “Якутскэнерго” акционернай хампаанньа үлэтин тупсарыыга анаан киллэрбит этиилэрин ырытыыта буолла. Кэпсэтиигэ «РусГидро» хампаанньа генеральнай дириэктэрэ Виктор Хмарин уонна бырабылыанньатын чилиэнэ Роман Бердников кыттыыны ыллылар.

Кинилэр электроэнергия котловой тарыыптарын ырыттылар уонна Бэрэсидьиэн боломуочунай бэрэстэбиитэлэ Юрий Трутнев энергетикэ эбийиэктэригэр саахал тахсыытын аччатарга сорудаҕын толоруу ньыматын көрдүлэр.

«Якутскэнерго» уонна «РусГидро» хампаанньалар өрөспүүбүлүкэ энергетикэтин ситимин, уотунан хааччыйыы систиэмэтин күүһүрдэргэ бырагыраама ылыммыттар. Бу бырагыраама саахалтан сылтаан уоту араарыы ахсаанын лаппа аччатыахтаах.