«Урамньы чороонун көтөҕөн»

Сунтаарга С.А.Зверев — Кыыл Уолун аатынан түмэлгэ уран оҥоһуктар араас кɵрүҥнэрин сырдатар, үйэтитэр кэрэхсэбиллээх быыстапкалар тиһиктээхтик буолаллар. Бу күннэргэ Сунтаар лиссиэйин түɵрт дьүɵгэлии уһуйааччылара «Урамньы чороонун кɵтɵҕɵн» диэн айар быыстапкалара тэрилиннэ.  

Урамньы чороонун кɵтɵҕɵн… Кэккэлэһэ турар түɵрт чороон… Хас биирдиилэрэ ураты кэрэ, умсугутар, угуйар, кэрэхсэтэр… Фекла, Изабелла, Анна уонна Ольга — Сунтаар идэни биэрэр кыһатыгар бииргэ үɵрэммит кыргыттар. Билигин тутуспутунан Сунтаар лиссиэйигэр айымньылаахтык үлэлиир ааттаах-суоллаах маастардар, уһуйааччылар.

Фекла Панфиловна оҕо эрдэҕиттэн учуутал буолуон баҕарар ырата лиссиэйгэ туолла. Кини «Ай-Сатаа» киинигэр оҕолору коллаж урамньытыгар уһуйар. Дьэрэкээн ɵҥнɵɵх, күлүмүрдүү оонньуур таас кыырпахтарын силимнээн арааһы бары айан-тутан таһаарар.

ϴрүс таастарын кырыылаан, чочуйан киһи кэрэхсиир киэргэллэрин, оҥоһуктарын Ольга Олеговна Сосина оҥорор. Кини огранщик идэтин баһылаан Саха сиригэр алмаас кырыылааччы бастакы кэрэ аҥардартан биирдэстэрэ.

Анна Попова — Сунтаар улууһун уран-уус оҥоһуктарын маастара. Уран тарбахтаах маастар оҕолору кылынан, сиэлинэн, туоһунан үлэлииргэ, ону-маны оҥорорго үɵрэтэр. Былырыын трансформер кыл сэлээппэтин үɵрэҕирии дьаарбаҥкатыгар олус сэргии кɵрбүттэрэ, киэҥ биһирэбили ылбыта. Анна ɵссɵ биир ураты оҥоһуга сапсыыка дэйбиир. Бу икки айар үлэтэ ааптарыскай бырааптаахтар.

Изабелла Иванова — маһынан уһанар Сунтаар улууһун маастара. Кини чочуйан оҥорбут трансформер чорооно үс иһит буолар. Кытыйа, балхах, ас хоторор иһит. Саха дьахтарын куукунатыгар олус туһалаах.

Кыргыттар бу айар түһүлгэлэригэр туох баар айбыт-туппут кэрэ айымньыларын киэҥ кɵрүүгэ таһааран дьон кэрэхсэбилин ыллылар.

Сɵҕɵбүн, сэргиибин. Хас биирдии чороон сурааһына, оҥоһуута, оһуора-мандара урааҥхай сахабын дэтэр күүһүн, дьүкээбил суһумугар ыалдьыттатар кэрэ бэйэлээх урамньытын…

Тускулаана ГОРОХОВА-КОБЕЛЬЯНОВА

Хаартыскалар: Тускулаана Горохова-Кобельянова тиксэриилэрэ