Хаартыска: ааптар тиксэриитэ
Уус Алдан улууһун Олоҥхо дьиэтигэр үгэс буолбут «Уус Алдан уран уустарын түһүлгэтэ» көрүү-күрэх буолла. Бу күрэххэ улуус Үһүс саас оскуолатын талааннаахтара, сыллата буоларын курдук, көхтөөхтүк кытыннылар.
Найахы «Симэхтэр» түмсүүттэн элбэх киһи киирэн ситиһии көтөллөннүлэр. Салаа салайааччытынан Уус Алдан улууһун норуотун маастара, педагогическай үлэ бэтэрээнэ, Саха Өрөспүүбүлүкэтин үөрэҕириитин туйгуна Галина Чукрова таһаарыылаахтык үлэлиир. Уран тарбахтаахтар түмсүүлэрин Саха Өрөспүүбүлүкэтин уус-уран оҥоһуктарын маастара Мария Федорова салайар. Бу быыстапкаҕа СӨ уус-уран оҥоһуктарын маастардара Маргарита Пестерева «Дьөһөгөй бэлэҕэ» кылтан-сиэлтэн оҥоһуктары көрүүгэ 1 үрдэл, Мария Федорова «Кырадаһын кустуга» көрүҥҥэ 2 үрдэл буоллулар. «Иис алыбар» Варвара Сивцева , » Туос тойугар» Дайаана Фомина үһүс үрдэли ыллылар. Далбар хотуттар Галина Чукрова, Альбина Колесова, Евдокия Гоголева, Мария Егорова, Светлана Константинова быыстапкаҕа кыттыыларын иһин туоһу суругу туттулар. Найахыттан Андриан Колесов «Кытыастар кыһалаах тимир ууһа» көрүүгэ бастакы үрдэл буолла. Кэрэхсэбиллээҕэ, найахылар бу быыстапкаҕа ыччаттарын кытыннардылар. Тохсус кылаас үөрэнээччитигэр Гелена Пестереваҕа кырадыһынтан тигиитин иһин «Кэскиллээх иистэнньэҥ» анал аат иҥэрилиннэ. Туой оҥоһугунан онус кылаас үөрэнээччитэ Күннэй Максимова кытынна ( салайааччылар Мария Пестерева, Екатерина Ксенофонтова).
Бороҕон нэһилиэгин Үһүс саас оскуолатыттан ( салайааччы Саха Өрөспүүбүлүкэтин култууратын туйгуна С. А. Прудецкая) иистэнньэҥнэр Сардаана Стрекаловская, Анастасия Габышева кытыннылар. Анастасия Гаврильевна түүлээхтэн дьахтар толору кыһыҥҥы таҥаһын тикпит улахан үлэтин аҕалла уонна «Өбүгэ үгэһин сөргүтэн» көрүҥҥэ бастакы үрдэлгэ таҕыста. Улуустааҕы, өрөспүүбүлүкэтээҕи көрүүлэр уонна эрэгийиэннэээҕи быыстапка кыайыылааҕа Сардаана Иннокентьевна бу күн Уус Алдан улууһун норуотун маастарын дастабырыанньатын, бэлиэтин улуус баһылыгын солбуйааччы Анатолий Сторожевтан үөрүүлээх быһыыга-майгыга тутта.
Саха Өрөспүүбүлүкэтин үөрэҕириитин туйгуна, РФ уопсай үөрэхтээһинин бочуоттаах үлэһитэ А. А .Васильева салайар Уһун Күөл салаатын талааннаах тарбахтаахтара улуус маастара Варвара Жиркова кыбытыы тигиигэ үһүс үрдэли, Оксана Гуляева туойтан оҥоһуктарынан 1 үрдэли ылары ситистилэр.
Мүрү салаатыттан Уус Алдан маастардара Галина Охлопкова салайар «Айар иис» уонна Любовь Саввина «Оҕуруо умсулҕана» улууска Үһүс саас оскуола тэриллииэҕиттэн ситимнээхтик үлэлээн кэлбит куруһуоктар сыллата ситиһиилэнэллэр. Любовь Николаевна «Оҕуруо оһуор үҥкүүтэ» анал аат хаһаайката буолла уонна иҥиир сабынан тикпит бэрэмэдийинэн «Өбүгэ үгэһин утумнааччы» ааттанна. Галина Мырсанова кыбытыы тигии халтаҥ соно сыаналанан, иккис үрдэлгэ таҕыста. Уус Алдан улууһун норуотун маастара Зинаида Поповаҕа «Ыраас сиик» анал аат иҥэрилиннэ.
Улууспутугар декоративнай-художественнай прикладной ускуустуба сайдыытыгар ситимнээх үлэ барара үөрдэр. Улуус дьаһалтата, култуура управленийата бу хайысхаҕа болҕомто ууран үлэлэһэллэр. Ымпык-чымпык үлэни Саха Өрөспүүбүлүкэтин култууратын туйгуна Матрена Герасимова иилээн-саҕалаан ыытар.
Матрена ГОТОВЦЕВА, улуустааҕы Үһүс саас оскуола салайааччыта