Ураты эҕэрдэ соһутта уонна үөртэ

Бэҕэһээ, Ийэ тыл, сурук-бичик күнүгэр, Киллэм култууратын дьиэтин үлэһиттэрэ ураты эҕэрдэлэринэн дьону соһуттулар уонна үөртүлэр.

Сарсыардаттан сахалыы мааны таҥас таҥнан, киэргэллэрин кэтэн, симэнэн Тулагы-Киллэмҥэ үлэлии-хамсыы олорор тэрилтэлэри кэрийдилэр. Истиҥ эҕэрдэни сэргэ билиини-көрүүнү тургутар бэртээхэй викторина ыыттылар, сахалыы үстүрүмүөннэргэ оонньоон ураты муусуканы иһитиннэрдилэр, баҕалаахтарга оонньотон көрөн кэрэ абылаҥар киллэрдилэр.

Бу күн «Оһуор» үҥкүүтүн үҥкүүлэтэн оҕолор уонна улахан дьон наһаа сэргэхсийдилэр, астыннылар. Онон күүтүүлээх бэлиэ күнү үөрэ-көтө уонна хаһааҥҥытааҕар да уратытык атаардылар.

Салгыы кырдьаҕастар олорор дьиэлэригэр сылдьан ырыа-тойук бэлэхтээтилэр, үҥкүүлээн аҕам саастаахтары үөртүлэр. Умнуллубат ураты күн буолла диэн дьон-сэргэ улаханнык астынна.

Светла Попова

Хаартыскалар ааптар тиксэриилэрэ