Урбаанньыт Ольга Григорьева «Поле чудес» биэриигэ кыттыыны ылла

Соторутааҕыта бу ааттаах-суоллаах биэриигэ саха иһитин оҥорор «Камелек» пиирмэ салайааччыта, урбаанньыт Ольга Григорьева уһуллан кэллэ.
«Бастаан ыам ыйын 19 күнүгэр көрдөрүөх буолбуттара да, «белорустары ыыттыбыт, эһиги ыам ыйын 26 күнүгэр көстүөххүт» диэн биллэрдилэр», — диэн кэпсэтиибитин саҕалаата Ольга Григорьева.
«Хаһан, ханна бу биэриигэ кыттар туһунан этии киирбитэй?» диэн ыйыппыппар, Ольга Григорьевна салгыы маннык кэпсээтэ:
«Быйыл тохсунньу саҥатыгар «Уникальная Россия» диэн тэрээһиҥҥэ кытта сырыттахпына, култуура тиһигэр үлэлиир биир дойдулаахтарбыт миэхэ кэлэн, «Поле  чудес» биэриигэ  уһуллуоҥ этэ дуо?»  диэн ыйыппыттара.  Мин сөбүлэспитим. Онтон олунньуга «уһулла кэл» диэн ыҥырбыттара. «Бакаа кыаллыбат» диэн аккаастаабытым. Кулун тутарга ыҥырбыттарыгар, эмиэ үлэм элбэҕэ бэрт буолан, баран уһуллубатаҕым.  Хата, дьонум  туппуттарын ыһыктыбат дьон буолан биэрдилэр, аны муус устарга ыҥырдылар. «Сүрэ бэрт, хайдах наар көһөрө олоруомуй?» дии санаат, тэринэн баран, Москвалаабытым. Табаарыспын ырыаһыт Саарыны «миигин өйөө…» диэн көрдөһөн илдьэ барбытым. Кини онно «Кырдал кыыһа» диэн ырыатын толорбута. Уһуллуом иннинэ бэрт уһун аҥкыатаны толорторбуттара. Уопсайынан, ити биэриигэ мээнэ киһи кыттыбат эбит. Баҕалаах олус элбэҕиттэн куонкурус олохтоммут. Ыытааччылар кыттааччылары  бэйэлэрэ талан ылаллар. Биэрии сүрүн соруга — Арассыыйа норуоттарын түмүү, сомоҕолооһун эбит. Санаабар, тэрээһиҥҥэ кыттыым табылынна. Олус астынным, дуоһуйууну ыллым, кынаттаммыт курдук сананным. Чэ, уонна тугу да кэпсээбэппин, барытын бэйэҕит көрөөрүҥ», — диэн сэһэргэһээччим биэриигэ кыттыбытын туһунан кэпсэтиибитин түмүктээтэ.

… Үөһэттэн ыйан биэрбит курдук, ыам ыйын 26 күнүгэр, Арассыыйа предпринимателин күнүгэр — идэлээх бырааһынньыгар бэйэтигэр уонна биир дойдулаахтарыгар бэлэх оҥорбут —  «Поле чудес» биэриигэ өрөспүүбүлүкэ биллэр урбаанньыта Ольга Григорьева кыттыыны ылыаҕа. Онон олох көтүтүмэҥ. Сэргээн көрүҥ.