Урукку ойоҕун билиҥҥи эриттэн харчы көрдөөбүт…

Мииринэйгэ эр киһи элбэх суумалаах харчыны күһэйэн көрдөөн, усулуобунай болдьоххо бириигэбэрдэннэ диэн СӨ Борокуратууратын пресс-сулууспата иһитиннэрэр.

Бу быһылаан ааһан эрэр сыл алтынньытыгар икки эр киһи ардыгар тахсыбыт. Олохтоох киһи урукку ойоҕун билиҥҥи эриттэн 1 мөлүйүөн солкуобайы көрдөөбүт. Кырбыам диэн сааммыт. Саҥа эр буолбут киһи сууттанааччыга моральнай хоромньуну төлүөхтээх үһү.

Онуоха анараа киһи аккаастаабытыгар, аны 1,1 мөл.солк. суумалаах массыынаны көрдөөбүт. Сыаналаах баай-дуол баарын кини социальнай ситимнэртэн билбит уонна эмиэ кырбыах буолан куттаабыт.

Эмсэҕэлээччи полицияҕа үҥсүбүт. Сууттанааччыны атыылааһын фиктивнэй дуогабарын түһэрсии кэмигэр туппуттар.

Суут бу киһини 2,5 сыл холоон көрөр болдьохтоох 7 сыл усулуобунай болдьоххо бириигэбэрдээбит.