Урукку ойоҕун дьиэтин түннүктэрин алдьаппыт

Ньурбатааҕы полиция отделын дьуһуурунай чааһыгар олохтоох дьахтар бас билиитин алдьаппыттарын туһунан иһитиннэрбит. Хоромньу 20 тыһ. солк. тэҥнэспит диэн СӨ ИДьМ пресс-сулууспата иһитиннэрэр.

Холуобунай ирдэбил үлэһиттэрэ алдьатыыга эмсэҕэлээччи дьахтар урукку кэргэнэ уорбаланарын быһаарбыттар. Бу — эрдэ сууттана сылдьыбыт 35 саастаах киһи.

Быһаарыллыбытынан, бу киһи түүн урукку ойоҕор кэлэн, оҕолорун кытта көрсүөн баҕарарын эппит. Ол эрээри эр киһи итирик туруктаах буолан, дьахтар кыбартыыратыгар киллэрбэтэх. Эр киһи таһырдьаттан тимир кыраабылы булан, дьиэ түннүктэрин алдьаппыт уонна барбыт.

«Умышленное уничтожение или повреждение имущества» диэн ыстайынан холуобунай дьыала тэрилиннэ.