Сайыммыт куйаас буолуо дуо?

Барыллаан сабаҕалааһынынан, 2025 сылга бэс ыйыгар уонна атырдьах ыйыгар Саха сиригэр уруккутааҕар куйаас буолуоҕа. Нуорманы аһарар температура ойуур баһаара  үөскүүр кутталын улаатыннарар. Бу туһунан УГМС начаалынньыгын солбуйааччы – Гидрометкиин начаалынньга Татьяна Маршалик иһитиннэрдэ.

«Саха сиригэр муус устарга салгын температурата нуорманы биллэ аһарар. Хаар ууллар, ол аата баһаар куттала саҕаланар. Былырыыҥҥы курдук, бэс ыйыгар баһаар кутталын иккис уонна үһүс, сорох сирдэргэ төрдүс, бэл, бэһис кылаастар бэлиэтэниэхтэрин сөп”, – диэтэ Маршалик.

Исписэлиистэр Саха сирин хотугулуу-илиҥҥи  өттүттэн  – Дьааҥы уонна Муома улуустарыттан долгуйаллар. Сабаҕалааһын  быһыытынан, кэлэр нэдиэлэҕэ ити улуустарга хаһааҥҥытааҕар да сылаас уонна кураанах күннэр күүтүллэллэр, ол хаар түргэнник ууллан, баһаар куттала улаатыытыгар тириэрдэр. “Ол иһин хотугулуу-илиҥҥи өттүн ураты хонтуруолга тутабыт”, – диэтэ эспиэр.

Саха сиригэр бэс уонна атырдьах ыйдара нуорматтан биллэ итии буолуохтарын сөп.

«Бу сабаҕалаан көрүүлэр. Сөп түбэһии 70 бырыһыаны аһарбат, онон толору мэктиэни биэрбэт”, — диэн Т.Маршалик  бэлиэтээн эттэ.