Урут бииргэ үлэлээбит киһитигэр көмөлөһөөрү

Дьокуускайга олорор биэнсийэлээх дьахтар урут бииргэ үлэлээбит кэллиэгэтигэр көмөлөһөөрү түөкүттэр угаайыларыгар киирэн биэрбит. Ол түмүгэр, 262 тыһ. тахса харчытыттан мэлийбит.

2 №-дээх полиция отделыгар 69 саастаах Дьокуускай олохтооҕо үҥсүү киллэрбит. Быһаарбытынан, киниэхэ урукку кэллиэгэтэ улахан сууманы ыларыгар итэҕэллээх киһи буоларыгар төлөпүөнүнэн көрдөспүт. Эмсэҕэлээччи билэр киһитин чахчы кыһалҕаламмыт дии санаан сөбүлэспит.

Салгыы киниэхэ баан үлэһитэ аатыран биир киһи эрийбит. Бу киһи эмсэҕэлээччигэ харчы ыларга элбэх сууманы онлайн-сыһыарыынан ыытар наада диэн эппит. Ол киһи ыйыытынан, эмсэҕэлээччи үстэ төхтүрүйэн ууруммут харчытын (уопсайа 262 тыһ.солк. тахса) ыыппыт. Ол эрээри, харчы көрдөспүт киһитин счетугар киирбэтэх. Онно биирдэ түөкүттэр угаайыларыгар киирэн биэрбитин өйдөөбүт.

Саха сирин ытыктабыллаах олохтоохторо! Түөкүттэр киһини албынныылларын кэрэйбэттэр. Араас психологическай албаһы туһаналлар. Өйдөөҥ: баан, быраабы араҥаччылыыр органнар харчыны хаһан да төлөпүөнүнэн, атын сыһыарыынан ыыттарбаттар.

СӨ ИДьМ пресс-сулууспата