Ааһан эрэр 2022 сыл спорка лауреаттарын эҕэрдэлээһин “Сэргэлээх уоттара” култуура киинигэр үрдүк тэрээһиннээхтик ыытылынна. СӨ Бырабыыталыстыбатын бэрэссэдээтэлэ Андрей Тарасенко уонна өрөспүүбүлүкэ физическэй култуураҕа уонна спорка миниистирэ Леонид Спиридонов бастыҥнарга наҕараадалары туттардылар.
Бастакы нүөмэрдээх лауреатынан Европа көҥүл тустууга чөмпүйүөнэ, тириэньэр Александр Софроновка эрчиллэр Амма ыччата, норуоттар икки ардыларынааҕы кылаастаах успуорт маастара Владимир Егоров буолла. Биллэрин курдук, Владимир Егоров Олимпийскай оонньууларга тиийэр сыаллаах-соруктаах, аан дойдутааҕы улахан түһүлгэлэргэ Македония судаарыстыбатын аатыттан ситиһиилээхтик тустар. Санаатын маннык үллэһиннэ:
“Сыл үчүгэйдик ааста. Ситиһии да, үөрүү да баар. Дьиэ кэргэммититигэр эбилиннибит, кыыстанныбыт. Онон, ааһан эрэр сылы дьолу-соргуну аҕалбыт сылынан ааҕабын. Саҥа дьыл кэнниттэн тута, Европа чөмпүйэнээтигэр бэлэмнэниибит саҕаланыаҕа. Германияҕа “Бундеслига” хамаанданан күрэхтэһиитигэр кыттыаҕым. Дагестанынан, Хасавюртунан, үрдүк хайаларынан сбордарга барыылар күүтэллэр. Ситиһии кэлэрэ барыта бэйэҕиттэн, бэйэ кыаҕар итэҕэйииттэн тутулуктаах дии саныыбын. Сырыыбар-айаммар, бэлэмнэниилэрбэр Сахам сирэ, биир дойдулаахтарым көмөлөһөллөр. Махталым улахан. Сыалым-соругум диэн, биллэн турар, Олимпийскай оонньууларга кыттыы. Олимпиада чугаһаата. Үчүгэйдик үлэлээтэххэ көрөдрүү кэлиэ диэммин эрэнэбин уонна эрэннэрэбин. Саха сирин олохтоохторун, спортсменнары кэлэн иһэр Саха дьылынан эҕэрдэлиибин. Олоххутугар, үлэҕитигэр ситиһиилэри, дьолу баҕарабын!
Дьокуускайтан дзюдоҕа Арассыыйа чөмпүйүөнэ Карина Ефимова, мас тардыһыы түһүлгэлэригэр биир да хотторуута суох, аан дойду чөмпүйүөнэ Семен Ануфриев (Уус-Алдан); боксаҕа Арассыыйа чөмпүйүөнүнэн буолары ситиспит Василий Егоров (Мэҥэ-Хаҥалас); самбоҕа Европа чөмпүйүөнэ Валерий Ергалов (Дьокуускай); уһуҥҥа сүүрүүлэргэ Арассыыйа чөмпүйүөнэ уонна үрүҥ көмүс призера Наталья Леонтьева (Сунтаар); Дьокуускай спортсменнара, классическай оҕунан ытыыга Бүтүн Арассыыйатааҕы күүстээх спортсменнар Спартакиадаларын чөмпүйүөнэ Рената Гаврильева, дуобакка Арассыыйа чөмпүйүөнэ Николай Стручков; кикбоксиҥҥа Арассыыйа чөмпүйүөнэ Михаил Иванов уонна спортиҥҥа Арассыыйа чөмпүйүөнэ Айаал Макаров үрдүк наҕараадаларын туттулар.
Адаптивнай успуорка бастыҥнарынан харбааһыҥҥа Арассыыйа уонна норуоттар икки ардыларынааҕы турнирдар чөмпүйүөннэрэ Анастасия Диодорова; дьаадыраны анньыыга уонна копьену быраҕыыга Арассыыйа чөмпүйүөнэ Айаал Сивцев; дьаадыраны анньыыга уонна диискэни быраҕыыга Арассыыйа чөмпүйүөнэ Василина Иванова; дуобакка Европа уонна Арассыыйа чөмпүйүөнэ, аан дойду призера Александр Ефимов; блочнай оҕунан ытыыга РФ чөмпүйүөнэ Виктор Скрыбыкин; дьаадыраны анньыыга уонна диискэни быраҕыыга паралимпиецтэр сайыҥҥы оонньууларын уонна Бүтүн Арассыыйатааҕы күрэхтэһиилэр чөмпүйүөннэрэ Виктория Петрова; тхэквондоҕа паралимпиецтэр сайыҥҥы оонньууларын призера, РФ боруонса призера Татьяна Белова; буулдьанан ытыыга Европа уонна РФ чөмпүйүөнэ Мария Егорова; дьаадыраны анньыыга уонна диискэни быраҕыыга Арассыыйа чөмпүйүөнэ Яков Максимов; пауэрлифтиҥҥэ РФ чөмпүйүөнэ, армрестлиҥҥэ Арассыыйа боруонса призера Сергей Безносов адаптивнай успуорка уон бастыҥнар кэккэлэригэр киирдилэр.
Саха норуотун тапталлаах ырыаһыта, бэйэтин кэмин чаҕылхай спортсмена, успуорт тэрийээччитэ, салайааччыта Аркадий Михайлович Алексеев физическэй култуура уонна успуорт эйгэтин чулууларыгар туттарыллар Саха АССР, РСФСР уонна ССРС үтүөлээх тириэньэрэ Д.П.Коркин аатынан судаарыстыбаннай бириэмийэ лауреатынан буолла уонна номоххо киирбит спортсмен, салайааччы быһыытынан үөрүүтүн үллэһиннэ:
«Үөрүүлээх күн буолла. Успуорт эйгэтигэр улахан наҕараадам суоҕа. Үлэлээбит үлэбин сыаналаатылар диэн наһаа үөрдүм, долгуйдум. Наар култуура өттүгэр охтон хааламмын, дьоҥҥо-сэргэҕэ үксүн ырыаһыт, музыкант курдук буолан хааллым гынан баран, дьиҥинэн, анал үөрэхтээх физкултуура уонна успуорт исписэлииһэбин. Успуорка холонон, күрэхтэһэ сылдьыбытым. Сүрдээх кыахтаах өрөспүүбүлүкэ “Урожайын” 1980-87 сылларга таһаарыылаахтык салайбытым, РФ Знамятын ыла сылдьыбыппыт. Үөрүйэҕи атастаһан Украинанан эҥин сылдьар этибит. Манчаары спартакиадаларын, Спортивнай оонньуулары, тыа сирин спортивнай оонньууларын тэрийэн ыыталыырбыт. Роман Дмитриев турнирын Эдьигээнтэн Дьокуускайга аҕалбытым. Оччолорго улахан спортивнай бааза суох этэ гынан баран, маассабай кыттыы улахан этэ. Билигин хайыһар өрө тутуллан сайдыан наада.
Компьютер үйэтэ кэлэн, олоруу элбээтэ. Хамсанан, эти-сиини хайаан да эрчийиллиэхтээх. Физкултуура уонна успуорт тус-туһунан хайысхалар буолалларын бэлиэтиэм этэ. Дьиҥинэн, успуорт диэн улахан наука буолар, ол сайдыан наада. Билигин сир аайы тутуулар, стадионнар бөҕө. Биһиги кэммитигэр көрүдүөргэ уонна таһырдьа дьарыктанарбыт. Саалалар суохтара. Ол гынан баран, биһиги дьулуурдаах этибит. Билигин профессиональнай успуорка охтуу буолла. 85 сааспынан үчүгэй бэлиэтээһин буолла. Билигин усулуобуйа тупсан, дьон үйэтэ уһаата. Баар-суох киһибит, Ил Дархаммыт Айсен Николаев кэлэр сылы Үлэ сылынан биллэрдэ. Онон бу сайдыылаах үйэбитигэр үлэлээн-хамсаан киһи үчүгэйдик олоруон сөп дии саныыбын. Өйү-санааны тутан, түмсүүлээх буолан, сайдыы суолугар турунуохтаахпыт. Кэлэн иһэр Саҥа дьылга сахам дьонугар, барыгытыгар, үтүө доруобуйаны, саҥа интэриэһинэй сонуннары, саҥа киириилэри, саҥа арыйыылары, үчүгэй доруобуйаны баҕарабын! Инники диэки хардыылыаҕыҥ диэммин ыҥырабын!
Буулдьанан ытыы тириэньэрэ Анатолий Мыреев, өрөспүүбүлүкэ физическэй культураҕа уонна маассабай успуорка управлениетын начаалынньыга Роман Оконешников Саха сирин физическэй култуураҕа уонна успуорка үтүөлээх үлэһиттэрин үрдүк ааттарын ыллылар. Е.А.Габышев аатынан Уус Алдан успуорт оскуолатын чэпчэки атлетикаҕа тириэньэрэ Серафим Татаринов, олимпийскай солбук боксаҕа оскуолатын тириэньэрэ Николай Егоров “Саха Өрөспүүбүлүкэтин үтүөлээх тириэньэрэ” үрдүк бэлиэлэри туттулар. Дьокуускай куорат 6 №-дээхспортивнай оскуолатын дириэктэрэ Константин Эйзнер “Гражданскай килбиэн” бэлиэнэн наҕараадаланна. Бүлүү оройуонун физическэй култуураҕа уонна успуорка управлениетын начаалынньыга Гаврил Евсеев уонна Намҥа олимпийскай эрэллэри бэлэмниир оҕо спортивнай оскуолатын дуобакка дириэктэрэ Василий Куприянов РФ успуорка миниистирин Махтал суругун ыллылар.
Уопсастыбаннай хамсааһын бастыҥнара
Дьокуускай куорат физическэй култуураҕа уонна успуорка управлениетын начаалынньыга Эдуард Ефимов, Муома улууһун дьаһалтатыгар, Алдаҥҥа олимпийскай эрэллэри бэлэмниир оҕо спортивнай оскуолатын дириэктэрэ Максим Скупой, Чурапчы улууһугар Хадаарга нэһилиэк сайдыытын киинэ 100-түү тыһыынча солкуобайдаах сэртипикээттэринэн наҕараадаланнылар.
Физкультура уонна спорт эйгэтин номинацияларын лауреаттарынан буоллулар:
“Спорка сулууспалааһын” – чэпчэки атлетикаҕа өрөспүүбүлүкэ элбэх төгүллээх чөмпүйүөнэ, “СӨ спортсменнарын Сойууһун” бэрэссэдээтэлин солбуйааччы Галина Сырмолотова; “Сыл бастыҥ тириэньэрэ”- дзюдоҕо өрөспүүбүлүкэ сүүмэрдэммит хамаандатын сүрүн тириэньэрэ Дамдиндорж Гомбодорж; “Бастыҥ судьуйа”- Бороҕоҥҥо Саха сирин норуоттарын VIII Спортивнай оонньууларын сүрүн судьуйата Николай Цыпандин; “Бастыҥ улуус” — Алексей Федотов баһылыктаах Уус Алдан улууһа; “Бастыҥ спортивнай общественнай тэрилтэ”- Ольга Григорьева президеннээх өрөспүүбүлүкэ остуол оонньууларыгар Федерацията; «Уопсастыбаннай успуорду бастыҥ тэрийээччи”- успуорт бэтэрээнэ Тихон Карамзин; “Успуорду бастыҥ ырытааччы”- “Спорт Якутии” сайт ситимин сүрүн эрэдээктэрэ Александр Посельскай; “Сыл мецената”- “Стройград” эргиэн киинин дириэктэрэ Петр Алексеев; “ГТО бастыҥ тэрийээччитэ”- Бүлүү куоратын физическэй култуураҕа уонна успуорка управлениетын начаалынньыга Степан Федоров лауреаттарынан буоллулар.
2022 сыл “Успуорка лауреаттарын бааллара” уус-уран самодеятельность кэнсиэринэн доҕуһуолланан үөрүүлээхтик, бырааһынньыктыы быһыыга-майгыга буолла.
Баһылай Посельскай,
Дьокуускай.
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…