Успуорт миниистирэ «Азия оҕолоро» ситиһиилээхтик ыытыллыбытын бэлиэтээтэ
![](https://sakha-sire.ru/wp-content/uploads/2024/07/ministr-sporta-rf.jpg)
РФ Успуорка миниистирэ Михаил Дегтярев, дойду бэрэсидьиэнигэр В.Путиҥҥа улахан спортивнай тэрээһин туһунан иһитиннэрэригэр, «Азия оҕолоро» ситиһиилээхтик ыытыллыбытын бэлиэтээн эттэ.
Кини «Азия оҕолоро» норуоттар икки ардыларынааҕы VIII спортивнай оонньууларга 24 судаарыстыба икки тыһыынчаттан тахса эдэр спортсмены түмпүтүн ыйда. Барыта 237 кэмпилиэк мэтээл успуорт 22 көрүҥэр оонньоммут.
Михаил Дегтярев «Азия оҕолоро» тэрээһин арыллыытыгар кыттыыны ылбыта. Кини: «Хас биирдии спортсмен бэйэтин кыаҕын-күүһүн, үчүгэй өрүтүн көрдөрөр кыахтанар. Итиэннэ күрэхтэһэн ылбыт мэтээллэрин эрэ буолбакка, биһиги дойдубутугар сылдьыбыт үтүө, кэрэ өйдөбүллэри өйүгэр-санаатыгар иҥэрэн илдьэ барыа. Бу күннэргэ Дьокуускайга элбэх сулус чаҕылыйыа!«, — диэн тэрээһин кыттыылаахтарыгар туһаайан эппитэ.
«Азия оҕолоро» норуоттар икки ардыларынааҕы VIII спортивнай оонньуу төрүттэммит дойдутугар — Дьокуускайга бэс ыйын 26 — от ыйын 7 күннэригэр буолла.
Киэҥ далааһыннаах тэрээһиҥҥэ Азербайджантан, Арменияттан, Афганистантан, Бангладештан, Беларусь Өрөспүүбүлүкэтиттэн, Грузияттан, Индияттан, Ирантан, Казахстантан, КНДР, Кытайтан, Кыргызстантан, Лаостан, Ливантан, Монголияттан, Палестинаттан, Пакистантан, Кореяттан, Сирияттан, Таджикистантан, Таилантан, Узбекистантан, ону сэргэ РФ эрэгийиэннэриттэн — 3 федеральнай уокуруктан, Москваттан уонна Саха Өрөспүүбүлүкэтиттэн барыта 1934 спортсмен кыттыыны ылла.
РФ Бэрэсидьиэнэ В.Путин «Азия оҕолоро» спортивнай оонньуулар кыттыылаахтарын эҕэрдэлииригэр, үгэскэ кубулуйбут күрэхтэһиилэр куруук үрдүк тэрээһиннээхтик уонна ураты айар таһымҥа баралларын, оҕо-ыччат успуордун сайдыытыгар улахан кылааты киллэрэллэрин, олимпийскай хамсааһын идиэйэтин тарҕаталларын, араас дойдулар норуоттарын доҕордоһууларын тэрийэллэрин бэлиэтээбитэ.
СӨ Ил Дархана Айсен Николаев ирбэт тоҥҥо Дьокуускай ураты, бөдөҥ куорат буоларын этэн туран, куорат оҕо аймах бырааһынньыгын, успуордун, доҕордоһууну истиҥник-иһирэхтик көрсөрүн, Саха сирин олохтоохторо Азия араас дойдуларын эдэркээн ыччаттара, оҕолоро Саха сирэ бүттүүнэ үөрүүнэн иҥэрэр истиҥ тапталын, иэйиитин өйдүү-саныы сылдьалларыгар баҕаралларын ыйбыта.
СӨ Ил Дарханын уонна Бырабыыталыстыбатын пресс-сулууспата
Хаартыскаҕа Андрей Сорокин түһэриитэ, СИА
Сообщить об опечатке
Текст, который будет отправлен нашим редакторам: