Хаартыска: Тамара Винокурова тиксэриитэ.
Өймөкөөн нэһилиэгэр айылҕа иэдээнигэр түбэспит олорор дьиэлэри чөлүгэр түһэриигэ Саха сирин үгүс улуустарыттан, Дьокуускайтан, араас министиэристибэлэртэн уонна биэдэмистибэлэртэн улахан көмөнү оҥорон, үтүө өйдөбүлү хаалларан бардылар.
Бу күннэргэ СӨ физкультура уонна успуорт министиэристибэтин биригээдэтэ кэлэн барбытын туһунан Өймөкөөн нэһилиэгин олохтооҕо Тамара Винокурова сырдатта:
— 14 киһилээх министиэристибэ биригээдэтин Николай Захаров салайан, тутааччылар 10 күн бэрт тахсыылаахтык үлэлээтилэр. Салайааччы биһиги улууспут биир элбэҕи эрэннэрэр чаҕылхай спортсменын, быйылгы Манчаары оонньууларыгар ситиһиилээхтик кыттыбыт тустуук Алексей Репин тириэньэрэ эбит.
Биригээдэ тутааччылара биир күн кыраайы үөрэтээччи Тамара Васильеваны кытта анаан билсэн, киниэхэ көмөлөһө сылдьан, Өймөкөөн улууһун баай устуоруйатын кэпсэтиннэрдилэр. Тамара Егоровна махталын биллэрэн спортсменнарга бэйэтин кинигэлэрин бэлэх уунна.
Биригээдэ үс бөлөххө арахсан, араас үлэҕэ сырытта. Тутааччы Кузьма Тарабукин «айылҕа иэдээнигэр түбэспит дьоҥҥо көмөлөһөр баҕалаах спортсменнар анаан түмсэн, улуус баһылыга Александр Оконешниковы өйөөн кэлбиппит. Олохтоохтор үлэлииргэ, олорорго бэртээхэй усулуобуйаны тэрийдилэр. Интэринээккэ олордон, миэстэтигэр олус минньигэстик аһаталлар. Аны маннык иэдээн хатыламматар ханнык. «Норуот күүһэ — көмүөл күүһэ», онон өрөспүүбүлүкэ бүттүүнүн көмөтө ыарахаттары кыайарга — төһүү күүс» диэн санаатын үллэһиннэ.
Спортсменнар барыны бары кэрэхсиир дьон буолан, нэһилиэк биир бэлиэ сиригэр Тырыбынаҕа илдьэ сырыттым. 1944 сыллаахха » Сүр көтөҕүү » ыһыаҕар ананан туруорбут сэргэлэрин көрдөрдүм. Махтал Мэҥэ бэлиэтин — олохтоох уус Семен Сивцев-Өймөкөөн Сэмэнэ оҥоһугун билиһиннэрдим. Бу биригээдэ састаабыгар олоҕун устатын тухары успуорт аргыстаах кэргэним Василий Винокуров тустуу эйгэтигэр бииргэ алтыһар табаарыһа Валериан Неустроев баар. Кини саамай аҕам саастаахтара. Күн аайы асчыттарга көмөлөһөн, кинилэр махталларын ылыан ылла. Валериан Иннокентьевич дойдутугар төннөөрү туран, «Өймөкөөҥҥө кэлэн үөрүүбүттэн үйэм уһаабыкка дылы буолла. Дьон бары махтана, алгыы хааллылар. Бу сиргэ саамай дьоллоох түгэн — дьон эйиэхэ махтаммыт үөрбүт хараҕа эбит» диэн олус долгуйан туран, анаан бэлиэтээн эттэ.
Бу курдук успуорт эйгэтин күүстээх-уохтаах уоланнара бэрт элбэҕи тутан, оҥорон, өрөмүөннээн, олохтоохтор махталларын уонна алгыстарын сүрэхтэригэр иҥэрэн бардылар. Барыларыгар үлэлэригэр үтүмэн ситиһиини, табыллыыны, үрдүктэн-үрдүк чыпчааллары баҕарабыт.
“Талааннаах киһи барытыгар талааннаах” диэн этии оруннааҕын үгүс түгэҥҥэ көрө-истэ сылдьабыт. Былырыыҥҥы “Үрдэл” ырыа бириэмийэтигэр…
Олунньу 1 күнүгэр Арчы дьиэтигэр өрөбүллээҕи Оһуокайбыт үрдүк таһымнаахтык ааста. Куоракка олорор уус алданнар тоҕуоруһан…
“Успуорт сарыыссатынан” ааттанар чэпчэки атлетика аата эрэ “Чэпчэки атлетика”. Дьиҥинэн, успуорт көрүҥнэриттэн биир уустуктара. Ким…
Билиҥҥи кэмҥэ волонтердар көмөлөрө олус улахан суолталаах. Тыһыынчанан волонтердар түмсэн байыаннай дьайыы кыттыылаахтарын өйүүллэр. Бүгүн…
Бу күннэргэ Дьокуускайга бэйэ дьыалатын социальнай хантараак нөҥүө тэриммит дьоҥҥо олус туһалаах тэрээһин буолан ааста.…
Сунтаарга бу өрөбүл күннэргэ хапсаҕайы таптааччыларга улахан үөрүү. Сыллата ыытыллар Бордоҥтон төрүттээх хапсаҕайга спорт маастара…